Gjest prekës: Atletico Madrid nderon nënën e kapitenit Koke me homazhe në Ligën e Kampionëve

Klubi spanjoll i Atletico Madridit ka njoftuar se do të zhvillojë një ceremoni nderimi përpara ndeshjes së mbrëmjes së sotme në Ligën e Kampionëve kundër Manchester Unitedit. Ky vendim vjen pas lajmit të hidhur për ndarjen nga jeta të zonjës Ana Merodio Borja, nënës së kapitenit të skuadrës, Koke, e cila ndërroi jetë mëngjesin e së martës në Madrid. Në një deklaratë zyrtare, klubi ka bërë të ditur se është kërkuar dhe marrë aprovimi nga UEFA për të mbajtur një minutë heshtje në kujtim të saj, si në ndeshjen e ekipit të parë, ashtu edhe në atë të UEFA Youth League. Për më tepër, lojtarët do të mbajnë shirita të zinj në krahë, ndërsa flamuri i klubit në stadiumin ‘Riyadh Air Metropolitano’ është ulur në gjysmështizë si shenjë zie. “Klubi ynë shpreh ngushëllimet më të thella për familjen dhe miqtë e të ndjerës, veçanërisht për kapitenin tonë Koke dhe ndihmëstrajnerin e ekipit Juvenil A, Borja Resurrección. U prehtë në paqe”, thuhet ndër të tjera në njoftimin e klubit madrilen. Sa i përket anës sportive, mungesa e kapitenit Koke është e konfirmuar për këtë përballje të rëndësishme evropiane. Trajneri Diego Simeone ka publikuar listën e futbollistëve të grumbulluar, ku përveç Kokes, pjesa tjetër e kontingjentit është në dispozicion për duelin ndaj Manchester Unitedit.