Arsenal armësh dhe granata dore të sekuestruara në Zubin Potok, policia në kërkim të përgjegjësve

Operacion i suksesshëm i Policisë së Kosovës në veri të vendit. Gjatë një aksioni të zhvilluar në dy fshatra të komunës së Zubin Potokut, forcat e rendit kanë zbuluar dhe konfiskuar sasi të konsiderueshme armësh, municionesh dhe pajisje ushtarake të fshehura në objekte të pabanuara. Ndërhyrja, e cila u realizua më 13 tetor nga Drejtoria Rajonale e Policisë në Mitrovicën e Veriut, erdhi si rezultat i informacioneve të siguruara nga qytetarët. Autoritetet kishin marrë sinjale se në objekte të caktuara po mbaheshin mjete ilegale, gjë që vuri në lëvizje njësitë përkatëse. Në fshatin Parucë, gjatë kontrollit në një ndërtesë që shërbente si stallë bagëtish, policia gjeti një arsenal të vërtetë: katër granata dore, mbi 160 fishekë të kalibrave të ndryshëm, një tytë pushke gjuetie, pajisje për mbushjen e municionit, barot, si dhe pajisje ushtarake përfshirë një maskë gazi dhe një bajonetë. Ndërkohë, në fshatin Ranqiq, aksioni vijoi në një tjetër objekt të pabanuar. Aty u sekuestrua një pistoletë, katër granata të tjera dore dhe një sasi e madhe municioni prej 2 mijë e 56 fishekësh të kalibrave të ndryshëm. Për sigurinë e zonës, njësitë për trajtimin e mjeteve eksplozive (IEOD) bënë tërheqjen e kontrolluar të mjeteve shpërthyese. Aktualisht, autoritetet policore bëjnë të ditur se nuk ka asnjë person të arrestuar në lidhje me këto gjetje. Rasti është duke u hetuar nën drejtimin e Prokurorit të Shtetit, me dyshimin për kryerjen e veprës penale “Mbajtje në pronësi, kontroll ose posedim të paautorizuar të armëve”.