Përshkallëzim në Detin e Zi: Dronët goditin dy anije pranë brigjeve bullgare brenda pak ditësh

Kryeministri i Bullgarisë, Rumen Radev, ka bërë publike goditjen e dy anijeve nga dronë në afërsi të ujërave territoriale të vendit, duke shënuar kështu incidentin e dytë të ngjashëm brenda një jave. Ai konfirmoi se një anije mallrash u sulmua nga tre dronë, ndërsa pak kohë më vonë një tjetër mjet lundrues u godit dhe përfundoi i fundosur. “Ky është një incident krejtësisht i papranueshëm. Një tjetër sulm ka ndodhur shumë pranë ujërave territoriale të Bullgarisë,” uexprimi kryeministri bullgar, i cili specifikoi se mjeti i parë ishte anija e mallrave “Chelsea 3” me flamur të Maltës. Të 15 anëtarët e ekuipazhit, ku bënin pjesë 7 shtetas ukrainas dhe 8 azerbajxhanas, u shpëtuan me sukses. Megjithëse la të kuptohej se pas këtyre ngjarjeve mund të qëndrojë Rusia, Radev pranoi se autoritetet ende nuk kanë prova të mjaftueshme dhe konkrete për të drejtuar akuza formale ndaj ndonjë pale të caktuar. Megjithatë, ai bëri të ditur se do të thërrasë në një takim ambasadorin rus për të diskutuar mbi këtë incident serioz. Sipas të dhënave nga autoritetet bullgare, nga anija e dytë e quajtur “Azov Concord” vetëm 5 marinarë arritën të evakuohen, ndërkohë që 11 pjesëtarë të tjerë të ekuipazhit vazhdojnë të jenë të zhdukur. Lidhur me këto zhvillime, sekretari i përgjithshëm i NATO-s njoftoi se ka zhvilluar një bisedë me kreun e qeverisë bullgare. “Aleanca do të vijojë bashkëpunimin e ngushtë me vendet anëtare në rajon. Ne kemi forcuar tashmë praninë mbrojtëse përgjatë krahut lindor dhe do të vazhdojmë të monitorojmë situatën e sigurisë dhe të përshtasim masat parandaluese dhe mbrojtëse sipas nevojës,” theksoi ai. Këto sulme pranë brigjeve bullgare kanë ngritur alarmin në arenën ndërkombëtare, duke u dënuar me ashpërsi si nga Brukseli, ashtu edhe nga Ukraina, e cila ka fajësuar drejtpërdrejt Moskën. “Deti i Zi është kthyer në një tjetër front të përshkallëzimit të luftës së Rusisë ndaj Ukrainës. Ky është një zhvillim i papranueshëm,” deklaroi Presidentja e KE-së, Ursula fon der Leyen. Në të njëjtën linjë, gjatë një deklarate të dhënë më herët nga Warszawa, komandanti suprem i forcave aleate të NATO-s në Evropë, gjenerali amerikan Alexus Grynkewich, lëshoi një paralajmërim të qartë se aleanca do të kundërpërgjigjet ndaj çdo sulmi rus, në kuadër të një strategjie të re të njohur si “Teoria e Fitores”.