Start shpërthyes i Besëlidhjes, kampionët e basketbollit mposhtin bindshëm Partizanin

Kampionati kombëtar i basketbollit për meshkuj ka vijuar me sfidat e javës së parë, ku në qendër të vëmendjes ka qenë debutimi i kampionëve në fuqi të Besëlidhjes. Skuadra lezhjane ka nisur rrugëtimin për mbrojtjen e trofeut me një paraqitje spektakolare në parket ndaj Partizanit. Në përballjen e zhvilluar në pallatin e sportit “Asllan Rusi”, djemtë e drejtuar nga trajneri Afrim Bilali nuk kanë pasur aspak vështirësi, duke triumfuar me shifrat e thella 112-52. Përballë dy skuadrave me ambicie krejtësisht të ndryshme këtë sezon, epërsia e lezhjanëve u reflektua qartë që në start, duke fituar periodën e parë 24-14 dhe të thelluar të dytën 27-15, për ta mbyllur pjesën e parë me avantazhin e përgjithshëm 51-29. Edhe fraksioni i dytë i lojës foli plotësisht në favor të kampionëve. Dominimi i Besëlidhjes u konfirmua me fitoren e dy periodave të mbetura përkatësisht me shifrat 31-12 dhe 30-11, duke e vulosur fitoren përfundimtare me një diferencë prej 60 pikësh. Kjo ishte një dëshmi e qartë e forcës së grupit, ku spikatën sidomos 65 pikët e siguruara nga lojtarët e ardhur nga pankina. Me plot gjashtë basketbollistë që regjistruan shifra dyshifrore, Andri Jareci u dallua si lojtari më efikas i Besëlidhjes, duke kontribuar me 12 pikë, 14 kërcime dhe 3 asiste. Nga ana e Partizanit, vetëm Fabio Paloka arriti të kalonte kuotën dyshifrore të pikëve, duke realizuar gjithashtu 12 pikë. Sa i përket takimeve të tjera të javës së parë, Vllaznia triumfoi ndaj Elbasanit me rezultatin 97-80, Teuta mori një fitore jashtë fushe në Vlorë përballë Flamurtarit me shifrat 96-82, ndërsa Kamza mposhti Tiranën 79-65. Kjo javë e parë e kampionatit do të mbyllet përfundimisht ditën e sotme me derbin tradicional të juglindjes mes Pogradecit dhe Skënderbeut, sfidë kjo e cila do të luhet duke filluar nga ora 19:00 në sallën “Arefi Berberi”.