Kanosja e gazetarit Lirim Mehmetaj, Prokuroria zbardh arsyet e ndalimit 48-orësh të Gani Gecit

Prokuroria Themelore në Prishtinë ka dalë me një njoftim zyrtar duke sqaruar rrethanat e ndalimit të ish-deputetit Gani Geci. Institucioni i akuzës ka bërë të ditur se Geci është dërguar në mbajtje për 48 orë, nën dyshimet e arsyeshme se ka kanosur gazetarin Lirim Mehmetaj. Sipas komunikatës zyrtare, ngjarja dyshohet se ka ndodhur për shkak të punës dhe angazhimit profesional të gazetarit në fjalë. "Me urdhër të prokurorit kujdestar, një person me inicialet G.G. është ndaluar për 48 orë, pasi ekziston dyshimi i bazuar se ka kryer veprën penale ‘Kanosja’, e cila sanksionohet nga neni 181 i Kodit Penal të Republikës së Kosovës", thuhet në njoftimin e Prokurorisë. Në kuadër të procedurave hetimore, autoritetet kanë zhvilluar intervistat e nevojshme me palët e përfshira në ngjarje. "Për të siguruar informacionet e duhura dhe për të ndriçuar ngjarjen, janë dëgjuar në cilësinë e të dëmtuarit gazetari L.M., si dhe është marrë në pyetje i dyshuari G.G.", bëhet e ditur tutje. Ndërkohë, prokurori kompetent ka autorizuar zyrtarët e Policisë së Kosovës që të ndërmarrin të gjitha veprimet e nevojshme operative e hetimore për zbardhjen e plotë të këtij rasti dhe sigurimin e provave materiale. Në fund të njoftimit, Prokuroria Themelore në Prishtinë ka përsëritur qëndrimin e saj të palëkundur për mbrojtjen e punonjësve të mediave. "Prokuroria Themelore në Prishtinë mbetet e përkushtuar në mbrojtjen e gazetarëve dhe garantimin e sigurisë së tyre, si dhe në respektimin e plotë të lirisë së shprehjes", përfundon komunikata.