Bllokimi në GJKKO, Xhafaj dhe Metani debatues mbi hapësirat ligjore të ndërhyrjes nga ILD

Përplasja e fundit mes avokatëve dhe Gjykatës së Posaçme kundër Korrupsionit dhe Krimit të Organizuar (GJKKO) është vënë në qendër të vëmendjes gjatë mbledhjes së Komisionit për Nismat Qytetare, Bashkëpunimin dhe Mbikëqyrjen Institucionale. Kryetari i komisionit, Fatmir Xhafaj, ka hapur diskutimin me Inspektorin e Lartë të Drejtësisë, Artur Metani, duke shprehur shqetësimin e thellë për ndikimin negativ që ky ngërç po jep në mbarëvajtjen e çështjeve gjyqësore dhe të drejtat e qytetarëve. Ai kërkoi të njihej nëse institucioni i ILD-së ka mekanizmat e duhur ligjorë për t'u përfshirë në zgjidhjen e kësaj situate. “Sot kemi një ngërç të krijuar në GJKKO, Shkalla e Parë. Ka një mosmarrëveshje të hapur publike mes avokatëve dhe GJKKO-së. Ka një mundësi, përpjekje, ndërhyrje nga ana e Inspektorit për ta zgjidhur, se në finale ajo që e pëson është sistemi, dhënia e drejtësisë dhe qytetarët drejtpërdrejt. Ne e kemi shqetësimin. E shihni ju veten, në kompetencat që ju jep ligji, që mund të ndërhyni për të gjetur një zgjidhje të ligjshme, të drejtë, që ky ngërç të tejkalohet?”, u përgjeri Xhafaj gjatë pyetjes drejtuar Metanit. Në përgjigjen e tij, Kryeinspektori Artur Metani theksoi se situata ndiqet me vëmendje të lartë, por sqaroi se kufizimet ligjore nuk lejojnë një ndërhyrje direkte të kësaj natyre, e cila rrezikon të kalojë në kufijtë e shkeljeve disiplinore ose të dalë jashtë misionit institucional të ILD-së. “E ndjekim me shumë vëmendje dhe çdo ditë kemi diskutime për atë që ndodh. Për të qenë strikt ligjorë, me kompetencat që ILD-së, se e kemi parë në këtë këndvështrim, së pari do të degjeneronte apo do të shkonte drejt një shkeljeje të natyrës disiplinore. Së dyti, ajo që thatë është më shumë pjesë e një tryeze mes palëve që kanë këtë diskutim dhe kjo shkon përtej kompetencave që ka ILD, por edhe ka më tepër lidhje me karakteret njerëzore sesa me diskutimet ligjore që mund të bëhen midis palëve. Nuk kam një mendim sot, por e ndjekim me shumë vëmendje për aq sa na takon. Si institucion do të ishim të gatshëm të ndihmonim për aq sa mund të ndihmonim, por nuk është një gjë që varet vetëm nga dëshira e Inspektorit të ILD-së”, u shpreh Metani. Nga ana e tij, kreu i komisionit mbajti një qëndrim të ndryshëm sa i përket rolit që mund të luajë ky institucion, duke argumentuar se bllokimi prek drejtpërdrejt parimin e procesit të rregullt ligjor dhe zvarritjen e seancave. “Unë mendoj paksa ndryshe. Ka një pozicion nga ku mund të ndërhyjë Inspektori, se aty cenohet një parim shumë i rëndësishëm, që është procesi i rregullt ligjor. Ka dhe një pasojë të drejtpërdrejtë, që është zgjatja e proceseve gjyqësore dhe, nga ky këndvështrim, mund të ndërhyjë Inspektori. Unë nuk e vë në diskutim aktin. Ne të gjithë bashkë na shqetëson ngërçi i krijuar, efekti që ai sjell. Se cila është zgjidhja u takon palëve, se ata nuk janë individë, por institucione. Do të ishte e arsyeshme një ndërhyrje. I përmbahem asaj mbi të cilën është ndërtuar vetë sistemi. Flasim për balancat dhe kontrollin reciprok dhe, në këtë aspekt, ILD ka një rol të rëndësishëm për ta ruajtur këtë balancë. Ne jemi përfshirë në tri çështje të rëndësishme: çështjet penale, procesin e rregullt ligjor dhe e treta lidhet me çështjet e prapambetura, në kuptimin e tejkalimit normal”, theksoi Xhafaj. Në mbyllje të këtij shkëmbimi, Metani vlerësoi bashkëpunimin ndërinstitucional dhe sugjeroi se një rrugë tjetër ligjore për përfshirjen e ILD-së do të ishte kërkesa formale nga vetë komisioni për nisjen e inspektimeve tematike. “Ky është dhe këndvështrimi personal, që raporti që duhet të ketë ky Komision me ILD-në, së pari, për të ndarë këtu shqetësimet që ne kemi, më pas Komisioni të ushtrojë edhe rolin e tij për mbikëqyrjen e veprimtarisë së institucioneve të drejtësisë. Së dyti, ashtu siç thatë, do ta shikoja me shumë partneritet marrëdhëniet midis Komisionit dhe Inspektorit të Drejtësisë. Madje edhe Komisioni mund t’i kërkojë Inspektorit të Lartë të Drejtësisë ushtrimin e inspektimeve tematike të caktuara për shkak të veprimtarisë”, përfundoi ai.