Panamaja tronditet sërish nga një tërmet me magnitudë 6.4, vazhdojnë pasgoditjet pas lëkundjes shkatërrimtare 7.7 ballë

Territori i Panamasë është përfshirë sërish nga paniku pasi një tjetër tërmet i fuqishëm me magnitudë 6.4 është regjistruar në vend, duke shtuar shqetësimin e qytetarëve pas serisë së gjatë të lëkundjeve sizmike të ditëve të fundit. Sipas të dhënave nga Instituti i Gjeoshkencës pranë Universitetit të Panamasë, ngjarja sizmike u shënua në orën 18:20 me orën lokale. Epiqendra e tërmetit u lokalizua përgjatë brigjeve jugore të provincës Veraguas, ndërsa vatra e tij kishte një thellësi mjaft të vogël, prej vetëm 2 kilometrash. Nga ana tjetër, Qendra Sizmologjike Euro-Mesdhetare (EMSC) dhe Shërbimi Gjeologjik i Shteteve të Bashkuara (USGS) e llogaritën magnitudën e kësaj lëkundjeje në 6.1 ballë. Autoritetet bëjnë me dije se mbi 300 pasgoditje janë shënuar në mbarë vendin që prej tërmetit masiv me magnitudë 7.7 ballë që goditi Panamanë të premten. Kjo serë tërmetesh ka dëmtuar rëndë qindra shtëpi dhe elementë të infrastrukturës, çka ka detyruar qeverinë të shpallë gjendjen e jashtëzakonshme. Fatmirësisht, deri në këto momente nuk raportohen humbje jetësh njerëzore si pasojë e ngjarjes së të premtes, ndërsa bilanci flet për 27 të plagosur dhe afro 900 banesa të dëmtuara. Ekipet e emergjencës po vazhdojnë pandërprerë terrenin për të verifikuar dëmet, sidomos në zonat e izoluara dhe komunitetet e largëta, ku shifrat mund të pësojnë ndryshime.