Kanosja e gazetarit Lirim Mehmetaj, Prokuroria urdhëron ndalimin e ish-deputetit Gani Geci

Prokuroria Themelore në Prishtinë ka marrë vendim për ndalimin prej 48 orësh të ish-deputetit të Lidhje Demokratike të Kosovës, Gani Geci, pasi ky i fundit u paraqit në organet e rendit për t'u ballafaquar me dyshimet rreth një kërcënimi të drejtuar ndaj gazetarit Lirim Mehmetaj. Ish-ligjvënësi u dorëzua dhe u mor në pyetje gjatë mbrëmjes së së hënës nga hetuesit e Drejtorisë së Krimeve të Rënda në kryeqytet, duke u trajtuar zyrtarisht si i dyshuar për veprën penale të kanosjes. Vetë gazetari Mehmetaj bëri të ditur se e ka denoncuar penalisht Gecin në orët e para të së hënës, pas presioneve të vazhdueshme që kishte pranuar lidhur me një shkrim të tij. I ftuar në emisionin “Debat Plus” në RTV Dukagjini, Mehmetaj shpjegoi se kishte pasur kontakte me ish-deputetin që të dielën, ku i ishte kërkuar që të fshinte ose të modifikonte një postim kushtuar deputetit Fatos Geci. “Deputeti i VV-së, Fatos Geci ka bërë një publikim ku ia adreson Thaçit dhe të tjerëve 144 vrasje. Unë e kam sqaruar se kjo nuk qëndron. Ai është një analfabet. Prej familjes Geci më kanë kontaktuar dje, më kanë thënë me e heq postimin, kam thënë jo – njëherë me të mirë, pastaj kanë vazhduar me forma të tjera”, u shpreh Mehmetaj. Sipas gazetarit, presioni kishte eskaluar kur përfaqësues të familjes Geci i ishin paraqitur në zyrë për ta detyruar që të hiqte shkrimin, gjë që e shtyu atë t'i drejtohej menjëherë institucioneve të sigurisë, duke shtuar se nuk ka ndërmend të tërhiqet nga qëndrimi i tij. Gjatë transmetimit live të po këtij emisioni, moderatori Ermal Panduri tregoi se Gani Geci ishte vërejtur në parkingun e televizionit pikërisht në kohën kur po diskutohej ngjarja, ndërkohë që vetë gazetari Mehmetaj ndodhej në studio.