Vala e largimeve nga Rusia: Si po ndikojnë qytetarët rusë te çmimet e qirave në Gjeorgji, Armeni dhe Bjellorusie

Çmimet e qirave në Gjeorgji dhe Armeni kanë shënuar një rritje prej 20 deri në 30 për qind në baza vjetore gjatë muajve të verës. Ky ndryshim vjen si pasojë e dyndjes së qytetarëve rusë, të cilët, të frikësuar nga një valë e re e mobilizimit ushtarak për luftën në Ukrainë, po kërkojnë strehim në ish-republikat sovjetike ku lejohet hyjca pa vizë. Gjeorgjia mbetet destinacioni më i qasshëm për shtetasit rusë, ku ata mund të qëndrojnë deri në 360 ditë pa vizë dhe ta rifillojnë këtë afat përmes një vizite të shkurtër në një shtet fqinj. Aktualisht, dhjetëra mijëra rusë jetojnë në këtë shtet. Në kryeqytetin gjeorgjian, Tbilisi, qiratë mujore për banesa standarde lëvizin nga 450 deri në 730 euro, kurse apartamentet më të mëdha apo luksoze arrijnë shifra nga 910 deri në 2.700 euro ose edhe më shumë. Sipas Zyrës Kombëtare të Statistikave të Gjeorgjisë, paga mesatare nominale mujore në vend është rreth 2.165 lari, ose afërsisht 750 euro. Pas kulmit të shënuar gjatë verës, çmimet e qirave në Gjeorgji kanë rënë dhe janë stabilizuar në përgjithësi. Rritjet më të mëdha u regjistruan gjatë viteve 2022–2023, kur qiratë u shtrenjtuan me 60 deri në 70 për qind pas fillimit të pushtimit të plotë të Ukrainës nga Rusia në fillim të vitit 2022. Në vitin 2023, shtetasit rusë përbënin mbi 55 për qind të të gjitha transaksioneve të pasurive të paluajtshme nga blerësit e huaj, por kjo përqindje ka rënë që atëherë me rreth një të tretën. Sipas bankës investuese Galt & Taggart, në vitin 2026, gjeorgjianët përbënin 76 për qind të transaksioneve në tregun e banesave të reja në Tbilisi, ndërsa blerësit izraelitë përbënin 11 për qind dhe rusët vetëm 3 për qind. Në qytetin bregdetar të Batumit, kërkesa paraqitet më e diversifikuar. Në Armeni, presioni mbi tregun e patundshmërive dhe qirave është edhe më i theksuar. Këtu, rusët dhe armenët e kthyer nga Rusia që ikin nga mobilizimi ushtarak, janë përqendruar kryesisht në Jerevan. Qiraja mujore për një apartament me dy dhoma në Jerevan kushton aktualisht nga 800 deri në 900 euro. Shtetasit rusë mund të hyjnë në Armeni pa vizë dhe të qëndrojnë deri në 180 ditë në vit. Një taksë prej 10 për qind, e cila tashmë kërkohet gjatë regjistrimit të kontratave të qirasë në Kadastrën e Armenisë, zakonisht u ngarkohet qiramarrësve. Sipas Komitetit të Kadastrës së Armenisë, çmimet mesatare të apartamenteve në ndërtesat shumëkatëshe në Jerevan u rritën me 2,9 për qind në gusht, krahasuar me korrikun, ndërsa në raport me të njëjtën periudhë të vitit paraprak shënuan rritje prej 23,5 për qind. Shtetasit rusë përbëjnë afërsisht 72 për qind të të gjitha transaksioneve të pasurive të paluajtshme të realizuara nga shtetasit e huaj në Armeni. Në anën tjetër, Bjellorusia ka tërhequr gjithashtu qytetarë rusë që nga fillimi i luftës në shkallë të plotë, fillimisht si zonë tranziti e më vonë për qëndrime afatgjata. Pas shpalljes së mobilizimit të pjesshëm në shtator të vitit 2022, kërkesa për banesa me qira afatshkurtra dhe afatmesme u rrit ndjeshëm në Minsk dhe qytetet pranë kufirit, si Bresti dhe Gomeli. Me mbylljen e kufijve evropianë për rusët dhe ashpërsimin e sanksioneve, Bjellorusia ka tërhequr një numër në rritje të banorëve afatgjatë dhe blerësve të pasurive të paluajtshme. Shtetasit rusë mund të qëndrojnë në Bjellorusi deri në 90 ditë pa regjistrim, ndërsa një kontratë afatgjatë qiraje u mundëson atyre të aplikojnë për leje qëndrimi.