Kurti takon ambasadorin belg: Theksimi i bashkëpunimit në siguri dhe planet për investime në energji e infrastrukturë

Kryeministri i vendit, Albin Kurti, ka zhvilluar një takim zyrtar mirëseardhjeje me shefin e ri të misionit diplomatik të Mbretërisë së Belgjikës në Kosovë, Arnaud Dusaucy, të cilit i ka përcjellë urimet më të sinqerta për përmbushjen e suksesshme të mandatit të tij të ri. Gjatë këtij bashkëbisedimi, kreu i ekzekutivit vendor vuri theksin te progresi i deritanishëm i partneritetit dypalësh, duke veçuar hapat e prekshëm të hedhur në fushat e sigurisë dhe drejtësisë. Ai përmendi bashkëpunimin e ngushtë në fushën e mbrojtjes, si dhe ratifikimin e marrëveshjes për bashkëpunim juridik ndërkombëtar në lëmin penal. Në fokus të bisedës ishin gjithashtu mundësitë konkrete për intensifikimin e marrëdhënieve ekonomike dhe strategjike, veçanërisht në sektorët e energjetikës dhe infrastrukturës. Të dy bashkëbiseduesit vlerësuan se ekzistojnë hapësira të gjera për nisma të përbashkëta dhe të terhiqen investime belge, ku diaspora jonë shërben si një urë e fuqishme lidhëse mes dy shteteve.