Tragjedia në Gjilan: Arsenal armësh dhe municion u zbuluan në shtëpinë ku babai dyshohet se vrau të birin

Fshati Pogragjë i Gjilanit është tronditur thellë mbrëmjen e së dielës, pasi shtëpia e familjes Arifi u shndërrua papritur në një skenë krimi, ku një 29-vjeçar dyshohet se u vra me armë zjarri nga vetë babai i jo. Ngjarja e rëndë u zbulua pasi trupi i pajetë i të riut u gjet brenda dhomës nga nëna e tij, ndërsa i dyshuari u largua me shpejtësi nga vendi i ngjarjes në një drejtim ende të panjohur për autoritetet. Megjithatë, pak orë pas tragjedisë, automjeti me të cilin u arratis i dyshuari u lokalizua dhe u sekuestrua nga forcat e rendit në afërsi të fshatit, ndërkohë që gjatë kontrollit në banesë u konfiskuan tri armë pa leje, 68 fishekë dhe katër gëzhoja. Sipas dëshmive të familjarëve, dhënë jashtë kamerave, marrëdhënia mes babait dhe djalit ka qenë normale dhe pa konflikte të dukshme, gjë që e bën ngjarjen edhe më të pakuptueshme për rrethin e tyre. Prokuroria Themelore në Gjilan ka konfirmuar se si viktima, ashtu edhe i dyshuari, nuk figurojnë me të kaluar kriminale dhe nuk ka pasur asnjë rast të raportuar më parë për dhunë në familje, ndërsa trupi i pajetë është dërguar në Institutin e Mjekësisë Ligjore për obduksion. Kjo është vrasja e dytë që trondit qytetin e Gjilanit brenda një jave, pas ngjarjes së rëndë të 9 tetorit, ku një bashkëshort dyshohet se vrau ish-gruan dhe vëllain e saj.