Steven Gerrard refuzon kategorikisht medaljen e Premier Leagues nëse i hiqet Manchester Cityt

Ish-kapiteni ikonik i Liverpoolit, Steven Gerrard, ka bërë të qartë se nuk do ta pranojë kurrë një medalje të kampionit nëse Manchester City shpallet fajtor për shkeljet financiare dhe i humbet titulli i fituar në edicionin 2013/14. Gjatë atij sezoni të zjarrtë, “Të Kuqtë” s’arritën të kurorëzohen kampionë nën drejtimin e trajnerit Brendan Rodgers, duke përfunduar në vendin e dytë me vetëm dy pikë më pak se rivalët nga Mancesteri, të drejtuar atëherë nga Manuel Pellegrini. Ndërkohë, një komision i pavarur ka konstatuar se klubi ‘skyblues’ ka fryrë në mënyrë artificiale të ardhurat komerciale në vlerë prej 830 milionë funtesh përgjatë harkut kohor 2009–2018. Në rast se vendimi mbetet në fuqi pas procesit të apelimit, një nga sanksionet që përflitet është edhe rishpërndarja e trofeve të asaj periudhe. Megjithatë, ky skenar nuk përbën aspak dëshirë për ish-mesfushorin anglez, i cili nuk pranon një nderim të tillë administrativ. I ftuar në podkastin “Overlap Daily”, ish-ylli i fushave u shpreh se drejtësia duhet të vihet në vend dhe se duhet të ketë masa ndëshkimore nëse akuzat vërtetohen, por nga ana tjetër hodhi poshtë mundësinë e marrjes së medaljes në tavolinë. “Shpresojmë që të ketë pasoja për të gjithë, sepse kjo është një betejë ligjore që po vazhdon. Ekziston një rregullore e re që kërkon një afat prej 12 javësh për të kuptuar hapat e radhës të apelit, pastaj çështja mund të përfundojë në Gjykatën e Arbitrazhit Sportiv dhe askush nuk e di se sa do të zgjasë,” u shpreh ai. Duke shprehur zhgënjimin e tij për zvarritjet burokratike, Gerrard shtoi se pasiguria rreth pafajësisë apo fajësisë po mban pezull opinionin sportiv, pavarësisht se gjasat anojnë nga dënimi i klubit. Legjenda e Anfield theksoi se vendimi i tij nuk buron nga ndonjë hatërmbetje personale ndaj lojtarëve të Manchester Cityt, të cilët i vlerëson lart për kontributin dhe sukseset e arritura në fushë. “Nuk është çështje personale me futbollistët e Manchester Cityt, sepse ata janë atletë të jashtëzakonshëm. Ata i kanë përjetuar ato emocione dhe i meritojnë sukseset e tyre. Unë nuk jam nga ata që ulen këtu e thonë se do të pranonin një medalje nga ato që kanë fituar ata,” tha mes tjerash ish-mesfushori. Duke u kthyer pas në kohë, Gerrard pranoi hapur plagët e së kaluarës dhe faktin se fati i tij futbollistik nuk përfshinte trofeun e Premier Leagues, duke përmendur edhe gabimin e njohur në përballjen ndaj Chelseat. “E kam pranuar realitetin se nuk e fitova kurrë Premier Leaguen. Më mungonte diçka në atë drejtim dhe jam pajtuar me këtë. Gjithashtu kam kaluar tutje për sa i takon asaj që ndodhi në fund të atij sezoni dhe rrëshqitjes sime kundër Chelseat,” shtoi ai. Megjithatë, ai ngriti shqetësimin mbi dëmin shpirtëror që mund t’u jetë shkaktuar klubeve dhe tifozëve të tjerë ndër vite nga këto parregullsi të mundshme. “Kam dëgjuar shumë mbështetës të Cityt të thonë se askush nuk mund t’ua fshijë ato kujtime. Por, po ju pyes: Po kujtimet që mund t’u jenë mohuar të tjerëve përgjatë një dekade çfarë bëhen?” “Duhet të mendojmë për tifozët e Tottenhamit, Manchester Unitedit, Evertonit, për skuadrat në zonën e ftohtë të tabelës, për ekipet që luftuan në kupat evropiane, si dhe për vetë lojtarët. Secili prej tyre duhet të reflektojë mbi momentet që mund të jenë cenuar,” paralajmëroi ai. Në fund të bisedës, Gerrard tregoi se ka diskutuar hapur edhe me drejtuesit më të lartë të Liverpoolit rreth kësaj dileme morale dhe se si do të reagonte nëse klubi i tij gjendej në një skandal të ngjashëm.