Kryeministri Rama pret në Tiranë kryediplomatin izraelit: Partneritet i fortë dhe mbështetje e palëkundur

Kryeministri i Shqipërisë, Edi Rama, ka zhvilluar një takim zyrtar në kryeqytetin shqiptar me ministrin e Jashtëm të Izraelit, Gideon Sa’ar, ku në qendër të vëmendjes kanë qenë bashkëpunimi bilateral dhe zhvillimet gjeopolitike. Pas takimit, kryediplomati izraelit ka ndarë përshtypjet e tij përmes një postimi në platformën sociale X, duke e cilësuar kreun e qeverisë shqiptare si një ndër figurat politike më etike dhe më me peshë në rrafshin global. Sa’ar ka vënë në dukje se Izraeli çmon lart kontributin e Shqipërisë dhe qëndrimet e prera të kreut të ekzekutivit shqiptar kundër fenomeneve të antisemitizmit dhe terrorizmit, duke e konsideruar atë një aleat të besueshëm në periudha sfiduese. Në fokus të bisedës mes dy zyrtarëve të lartë kanë qenë hapat e ardhshëm për intensifikimin e bashkëpunimit dypalësh, si dhe shkmbimi i mendimeve mbi situatën aktuale në Lindjen e Mesme dhe rajonin e Ballkanit Perëndimor. “Pata kënaqësinë të takohem sot në Tiranë me Kryeministrin e Shqipërisë, Edi Rama @ediramaal . Rama e ka udhëhequr Shqipërinë për 13 vjet rresht dhe, sipas mendimit tim, është një nga udhëheqësit më të shquar dhe më etikë në botë sot. Rama është një zë i qartë dhe i guximshëm në skenën ndërkombëtare. Ai është gjithashtu një mik i shquar i Izraelit, i cili na ka qëndruar pranë edhe në kohë sfiduese. Ne e vlerësojmë shumë angazhimin e tij për sigurinë e Izraelit dhe qëndrimin e tij të vendosur kundër antisemitizmit dhe terrorizmit. Ishte një bisedë e thellë rreth avancimit të marrëdhënieve midis vendeve, si dhe situatës në Lindjen e Mesme dhe Ballkanin Perëndimor. Faleminderit, Edi, për miqësinë tuaj të guximshme dhe miqësinë e thellë të Shqipërisë me Izraelin”, ka shkruar ai.