Tragjedi në Ferizaj: Humb jetën 54-vjeçari pasi bie nga kati përdhes në bodrum gjatë punimeve

Një ngjarje e rëndë ka tronditur qytetin e Ferizaj ditën e sotme, ku një punëtor 54-vjeçar ka ndërruar jetë pasi është rrëzuar gjatë orarit të punës në një objekt ndërtimi, i cili ndodhet në rrugën “Cen Dugolli”. Sipas të dhënave paraprake, viktima dyshohet se ka pësuar lëndime fatale pasi ka rënë nga kati përdhes në pjesën e bodrumit. Lajmin për tragjedinë e ka konfirmuar zëdhënësi i Policisë për rajonin e Ferizajt, Kanun Veseli, i cili bëri të ditur se autoritetet kompetente kanë mbërritur menjëherë në vendin e ngjarjes pas marrjes së informatës rreth orës 15:40. "Një person i moshës i 54 vjeç ka humbur jetën sot rreth orës 15:40, në rrugën ‘Cen Dugolli’ në Ferizaj, në objektet ndërtimi, pasi gjatë punimeve ndërtimore dyshohet se është rrëzuar nga kati përdhes në bodrum. Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Në vend ngjarje kanë dalë, veç patrullës së stacionit edhe hetimet rajonale. Ndërsa janë njoftuar te dalin edhe inspetorët e punës," u shpreh Veseli. Ndërkohë, lidhur me këtë rast tragjik, zëdhënësi i policisë konfirmoi se për të gjitha veprimet e mëtejshme hetimore dhe procedurale është njoftuar menjëherë prokurori i shtetit.