Përplasja në “Dueli Sportiv”: Debati i zjarrtë mes Liridon Lecit dhe Edonisa Aliut dyshohet se degjeneroi në dhunë fizike

Një diskutim tejet i tensionuar në studio ndërmjet trajnerit dhe analistit sportiv, Liridon Leci, dhe ish-futbollistes Edonisa Aliu, gjatë transmetimit të emisionit “Dueli Sportiv” në RTV Dukagjini, dyshohet se ka marrë një kthesë të rrezikshme menjëherë pas mbylljes së transmetimit. Sipas informacioneve të siguruara, tensionet kishin nisur gjatë edicionit të së dielës, kohë në të cilën dy protagonistët patën një përplasje verbale me tone të larta, duke u përfshirë në akuza të ndërsjella dhe debate që prekën edhe sfera personale. Në çastet e fundit të transmetimit, Leci kishte paralajmëruar largimin e tij përfundimtar nga ky emision, duke shfaqur hapur pakënaqësinë e tij lidhur me kriteret e ftesave për mysafirët e tjerë në panel. Me të rënë sipari i emisionit, bazuar në pretendimet e ngritura nga Aliu dhe detajet e raportuara mbi ngjarjen, situata dyshohet se ka kaluar nga fjalët te dhuna fizike, brenda hapësirave të televizionit të vendosur në Shkabaj.