Valë dhune në shkolla, Polonia mobilizon 20 mijë efektivë policie pas incidenteve të njëpasnjëshme

Pas një serie sulmesh të ndodhura në institucionet arsimore, forcat e rendit në Poloni kanë vënë në pranga 117 persona, ku pjesa dërrmuese e tyre janë të mitur dhe të rinj të moshës nga 13 deri në 19 vjeç. Duke filluar nga dita e sotme, rreth 20 mijë punonjës të policisë do të jenë në terren për të garantuar mbrojtjen dhe qetësinë në shkolla, ndërkohë që autoritetet kanë ushtruar kontrolle në afërsisht 65 mijë objekte shkollore. Ky zhvillim vjen pas një mbledhjeje urgjente të thirrur nga kryeministri Donald Tusk, ku morën pjesë anëtarë të kabinetit qeveritar dhe drejtues të agjencive ligjzbatuese. Gjatë këtij takimi, kreu i ekzekutivit sqaroi se deri më tani nuk ekzistojnë prova që të sugjerojnë praninë e një rrjeti të organizuar kriminal që fshihet pas këtyre sulmeve me qëllim destabilizimin apo frikësimin e shoqërisë. Në vend të kësaj, ekzekutivi polak vlerëson se incidentet e dhunshme janë kryesisht pasojë e fenomeneve negative që përhapen në hapstrën digjitale. Sipas kryeministrit Tusk, bëhet fjalë shpeshherë për akte impulsive që e kanë origjinën te përmbajtjet dhe dinamikat e krijuara në rrjetet sociale. Gjatë diskutimeve, u vu ankesë e veçantë edhe mbi prirjen në rritje të të rinjve drejt ideologjive ekstreme dhe materialeve me përmbajtje të dhunshme, një shqetësim ky që nuk prek vetëm Poloninë, por shtrihet në përmasa globale. Autoritetet po ndjekin me shqetësim të shtuar faktin se një numër adoleshentësh shfaqin interes të lartë në internet për ngjarjet, krimet naziste dhe mizoritë e Luftës së Dytë Botërore. “Ndër grupat që kemi identifikuar, të cilat kryesisht operojnë online, spikat një fenomen i caktuar. Edhe pse nuk bëhet fjalë për një strukturë të mirëorganizuar, kemi të bëjmë me një numër të rinjsh që përdorin hapësirën digjitale për të kërkuar në mënyrë të vazhdueshme materiale me natyrë naziste dhe referenca të dhunës nga koha e Luftës së Dytë Botërore”, u shpreh ndër të tjera kryeministri Tusk.