Përplasja rreth Gjykatës Speciale: Vlora Çitaku i kërkon Marta Kos t'i kthejë sytë nga Haga e jo te Kuvendi

Sekretarja e Partisë Demokratike të Kosovës, Vlora Çitaku, ka reaguar sërish ndaj Komisioneres Evropiane për Zgjerim, Marta Kos, duke theksuar se kjo e fundit do të duhej të shprehte shqetësim për mbarëvajtjen e drejtësisë në Dhomat e Specializuara në Hagë, e jo për vendimet legjislative që merren nga deputetët e Kuvendit të Kosovës në cilësinë e përfaqësuesve të popullit. “Askush nuk dëshiron t’i shmanget drejtësisë. Përkundrazi, duam që procesi të kthehet në binarë të drejtë, të garantohet një gjykim i drejtë dhe të respektohen të drejtat themelore të njeriut”, ka shkruar ajo në rrjetet sociale, duke shtuar se Gjykata Speciale u themelua për të pastruar historinë nga pretendimet për trafikim organesh të dalura nga raporti i Dick Marty-t, dhe jo për t'i fatuar Kosovës njollën e ndërmarrjes së përbashkët kriminale që cenon pastërtinë e luftës çlirimtare. Çitaku ka garantuar se Kosova nuk po shkel asnjë detyrim ndaj Bashkimit Evropian, duke u shprehur qartë se Gjykata Speciale nuk do të mbyllet, por do të vijojë mandatin e saj. Sipas saj, diskutimet për ndryshimet ligjore nuk përbëjnë ikje nga drejtësia, por synojnë respektimin e standardeve dhe të drejtave fundamentale njerëzore, shqetësime këto të dokumentuara tashmë edhe nga Komiteti për të Drejtat e Njeriut i Avokatëve të Anglisë dhe Uellsit (BHRC), që sipas saj kërkojnë vëmendje institucionale. Ajo ka rikujtuar se edhe Dhoma e Specializuar e Gjykatës Kushtetuese, përmes vendimit KSC-CC-2022 në paragrafin 83, ka adresuar kompetencën e Kuvendit për të kufizuar juridiksionin përmes ligjit, ndërsa ka sjellë në vëmendje edhe deklaratën e Presidentes së Komisionit Evropian, Ursula von der Leyen, e cila ka patur qëndrimin se çështja e ndryshimeve ligjore i takon vetë Kosovës, duke ngritur kështu dilema mbi koherencën e qëndrimeve brenda vetë institucionit evropian. Ndër të tjera, zyrtarja e lartë e PDK-së ka përsëritur se Kuvendi ka legjitimitetin e plotë kushtetues dhe detyrimin ndaj qytetarëve për të mbrojtur interesat e vendit dhe të vërtetën. Ajo ka vlerësuar lart partneritetin historik me NATO-n dhe BE-në, të cilët i quajti aleatë të UÇK-së dhe popullit të Kosovës, duke shtuar se dialogu dhe respekti i ndërsjellë mbeten rruga e duhur përpara. “Kuvendi i Kosovës i ka dyert e hapura. Jemi kurdo të gatshëm të ulemi, të bisedojmë dhe të eliminojmë çdo keqkuptim. Jam e bindur se, me mendje të hapur dhe qasje konstruktive, duke pasur si qëllim të përbashkët drejtësinë, do t’i tejkalojmë të gjitha keqkuptimet dhe në fund do të gjejmë pajtim”, ka viktuar Çitaku. Ajo ka përmbyllur se Kosova nuk kërkon privilegje apo shmangie nga përgjegjësia, por kërkon drejtësi meritore, mbrojtje të të drejtave të njeriut dhe ruajtje të narrativës së vërtetë historike të luftës, duke besuar fort se drejtësia dhe partneriteti ndërkombëtar nuk përjashtojnë njëri-tjetrin, por përkundrazi përbëjnë shtyllën kurrizore të besimit të ndërsjellë.