Investime milionëshe në shëndetësi: Kurti takon zv.presidentin e EIB para finalizimit të marrëveshjes

Kryeministri i Republikës së Kosovës, Albin Kurti, i shoqëruar nga ministri i Financave, Hekuran Murati, ka zhvilluar një takim zyrtar me zëvendëspresidentin e Bankës Evropiane të Investimeve (EIB), Robert de Groot. Takimi u mbajt në prag të nënshkrimit të marrëveshjes financiare, e cila do t'i hapë rrugë modernizimit të infrastrukturës shëndetësore dhe furnizimit me pajisje bashkëkohore mjekësore për spitalet publike në vend. Gjatë këtij bashkëbisedimi, kreu i ekzekutivit i theksoi mirënjohjen e tij z. De Groot për vizitën në Kosovë. Nga ana e tij, përfaqësuesi i lartë i EIB-së ka përcjellë urimet e tij për zgjedhjen e presidentes së re, një zhvillim ky që, sipas tij, ka kontribuar fuqishëm në rikthimin e stabilitetit institucional. Në fokus të bisedimeve ishin gjithashtu mundësitë e reja për thellimin e partneritetit dypalësh dhe zgjerimin e portofolit të investimeve të përbashkëta. Kryeministri Kurti vuri në dukje treguesit pozitivë të rritjes së qëndrueshme ekonomike, për çka u përgëzua nga zyrtari evropian. Më tej, kreu i Qeverisë prezantoi projektet strategjike zhvillimore, duke përfshirë planet për modernizimin e hekurudhave, ndërtimin e pesë digave të reja, si dhe përmirësimin e infrastrukturës sportive në kuadër të përgatitjeve për Lojërat Mesdhetare 2030. Po ashtu, palët diskutuan për zgjerimin e rrjetit të ngrohjes qendrore dhe sektorin e energjisë, me theks të veçantë te shtimi i kapaciteteve të reja prodhuese dhe diversifikimi i burimeve energjetike.