Marrëveshja në horizont: Courtois gati të zgjasë qëndrimin te Real Madridi

Thibaut Courtois dhe drejtuesit e Real Madridit po ecin me hapa të sigurt drejt arritjes së një akordi për vazhdimin e kontratës, e cila pritet ta mbajë portierin belg në kryeqytetin spanjoll deri më 30 qershor 2028. Klubi mbretëror i ka intesifikuar bisedimet me lojtarin, marrëveshja aktuale e të cilit skadonte në vitin 2027. Palët ndajnë një vullnet të përbashkët për zgjatjen e bashkëpunimit edhe për një tjetër sezone, kurse hapat zyrtarë për finalizimin e marrëveshjes pritet të ndodhin në një të ardhme të afërt. Edhe pse praktika e zakonshme e klubit për lojtarët mbi 30 vjeç është ofrimi i kontratave njëvjeçare, drejtuesit madrilenë kanë vendosur të mos zvarriten deri në përfundim të edicionit. Ky vendim vjen si pasojë e bindjes së plotë për peshën e madhe që ka gardiani belg në skuadër dhe dëshirës së patundur të tij për ta vazhduar rrugëtimin në stadiumin “Santiago Bernabeu”. Përmes këtij besimi të ndërsjellë, 34-vjeçari do të ketë mundësinë të ruajë kuadrat e portës së Real Madridit deri në moshën 36-vjeçare, duke plotësuar kështu një dekadë të plotë me fanellën e klubit. Prej transferimit të tij në vitin 2018 nga radhët e Chelseat, Courtois ka gdhendur emrin e tij mes portierëve më të suksesshëm në historinë e gjatë të klubit. Gjatë kësaj periudhe me fanellën e bardhë, ai ka ngritur tre herë trofeun e La Ligës dhe dy herë atë të Ligës e Kampionëve, duke lënë gjurmë të pashlyeshme me pritjet e tij në duelet më të rëndësishme evropiane.