Infrastrukturë më e mirë në Skënderaj, nisin punimet për rehabilitimin e rrugës drejt Klinës së Epërme

Ministri i Infrastrukturës, Dimal Basha, ka dhënë një lajm të rëndësishëm për banorët e Skënderajt, duke konfirmuar zyrtarisht lidhjen e kontratës për ndërhyrjen në rrugën rajonale R102, më konkretisht në segmentin që lidh Skënderaj me Klinën e Epërme. Sipas të dhënave zyrtare të bëra publike nga ministri, projekti parashikon sanimin e plotë të një gjatësie prej 1.8 kilometrash, ndërkohë që vlera totale e këtij investimi financiar kap shifrën prej 751 mijë e 570 euro e 95 centë. Nëpërmjet një deklarate zyrtare, Basha ka vënë inë dukje se gjendja e degraduar e këtij aksi rrugor ka përbërë një pengesë të vazhdueshme dhe një sfidë të përditshme për të gjithë qytetarët që e shfrytëzojnë për lëvizjet e tyre. Kreu i ministrisë ka bërë të me dije se zgjidhja e këtij problemi infrastrukturor ka qenë në fokusin e tij që nga dita e parë e marrjes së detyrës, duke u angazhuar maksimalisht për jetësimin e kësaj nisme. Ky intervenim synon drejtpërdrejt rritjen e parametrave të sigurisë në trafik, si dhe lehtësimin e qarkullimit dhe përmirësimin e dukshëm të standardeve të lëvizjes për banorët e zonës. Sa i përket dinamikës së punimeve, Basha ka bërë me dije se afati i parashikuar për përfundimin e tyre është 35 ditë kalendarike, ndërsa ka garantuar se do të ketë angazhim maksimal për punime cilësore dhe me ritme të lartë brenda afateve kohore të përcaktuara në marrëveshje. “Vazhdojmë me investime konkrete, duke adresuar problemet dhe duke përmirësuar infrastrukturën rrugore në çdo komunë të Kosovës”, ka deklaruar Basha.