Zv.ministri i Brendshëm i Greqisë nga Korça: Vizita këtu është një udhëtim drejt rrënjëve tona

Zëvendësministri i Brendshëm i Greqisë, i ngarkuar për Maqedoninë dhe Trakinë, Kostas Gjolekas, ka zhvilluar një vizitë zyrtare në qytetin e Korçës, i shoqëruar nga një delegacion i gjerë i përbërë nga figura të pushtetit vendor, përfaqësues të botës së biznesit dhe të universiteteve nga Greqia Veriore. Gjatë këtij udhëtimi në juglindje të vendit, zyrtari i lartë grek ka dhënë mesazhe që vënë theksin te prania e dikurshme dhe e vazhdueshme e komunitetit grek në këtë zonë, duke e cilësuar Korçën si një pikë referimi për historinë e tyre. “Çdo grek duhet të kalojë edhe nëpër Korçë, për të parë rrënjët e popullit tonë që ishte këtu e që vazhdon të jetë këtu”, u shpreh Gjolekas gjatë bisedës që pati me Mitropolitin Anastasios, sipas njoftimeve të agjencisë shtetërore greke të lajmeve. Në fjalën e tij, numri dy i Brendshëm i Greqisë vuri në pah vlerën e jashtëzakonshme historike dhe shpirtërore të kishës vendase, duke sugjeruar që vizitorët nga shteti fqinj ta eksplorojnë atë për të kuptuar më mirë trashëgiminë e përbashkët. Në kuadër të agjendës së tij, Gjolekas dhe delegacioni shoqërues vizituan mjediset e Konsullatës Greke në Korçë, ku zhvilluan një takim pune me konsullin Asterios Buzias. Itinerari i zyrtarit grek në qytetin juglindor u përmbyll me një takim të veçantë me anëtarë dhe personalitete të pakicës etnike greke që jetojnë e veprojnë në Korçë.