Marrëveshje përmes ndërmjetësuesve apo përplasje e re? Gani Geci flet për takimin me familjen e gazetarit Lirim Mehmetaj

Anëtari i Lidhjes Demokratike të Kosovës, Gani Geci, ka bërë publike një marrëveshje të arritur me familjen e gazetarit Lirim Mehmetaj, e cila sipas tij synon t'i jep fund replikave publike mes tyre. Nëpërmjet një postimi në rrjetet sociale, Geci ka sqaruar se takimi është realizuar falë angazhimit të deputetit Anton Quni dhe Fadil Hadërgjonajt. Ai ka theksuar se gjatë këtij takimi është rënë dakord që palët, përfshirë gazetarin Lirim Mehmetaj dhe anëtarët e familjes Geci, të mos merren më me njëri-tjetrin, qoftë përmes shkrimeve apo daljeve televizive. Kjo deklaratë e Gani Gecit erdhi menjëherë pas një shkrimi të publikuar një ditë më parë nga Lirim Mehmetaj, i cili kishte në qendër deputetin Fatos Geci. Megjithatë, situata ka marrë një kthesë të re pasi gazetari Mehmetaj ka ripostuar sërish statusin e tij fillestar për Fatos Gecin. Në reagimin e tij, ai ka bërë të qartë se do të vazhdojë të merret me secilin që, sipas tij, tenton të përhapë dezinformata.