Operacioni “TRIGGER X”: INTERPOL-i godet trafikun e armëve në Maqedoni, konfiskohen dhjetëra armë dhe mjete shpërthyese

Si pjesë e operacionit të gjerë ndërkombëtar të njohur si „TRIGGER X“, i koordinuar nga INTERPOL-i, autoritetet në Maqedoni kanë ndërmarrë një aksion të suksesshëm ku janë sekuestruar 27 armë zjarri, 604 copë municion, si dhe 10 mjete mino-eksplozive. Ky operacion u zbatua gjatë periudhës nga 22 qershori deri më 5 korrik 2026, falë angazhimit të përbashkët të Ministrisë së Punëve të Brendshme dhe Drejtorisë së Doganave. Qryellimi kryesor i këtij angazhimi ishte frenimi i tregtisë së paligjshme të armëve dhe goditja e rrjeteve të krimit ndërkufitar. Gjatë kësaj faze operacionale u ndërmorën gjithsej 35 bastisje, ndërkohë që u ushtruan kontrolle të detajuara ndaj 548 personave dhe 382 automjeteve. Përveç armëve të sekuestruara për të cilat do të nisen procedurat penale, strukturat e sigurisë konfiskuan edhe tri pushkë gjuetie, një pushkë pneumatike dhe 128 fishekë gjuetie, për të cilat do të ndiqen procedurat administrative përkatëse. Në kuadër të verifikimeve të kryera në vendkalimet kufitare të „Tabanocit“ dhe „Mexhitlisë“, dy persona ranë në pranga dhe u privuan nga liria. Po kështu, gjatë operacioneve paraprake, autoritetet kishin siguruar e sekuestruar edhe pistoleta të tjera, municione shtesë dhe tri granata dore. Në deklaratën e dhënë nga Ministria e Punëve të Brendshme nënvizohet se iniciativa të këtij niveli luajnë një rol kyç në rritjen e bashkëpunimit policor ndërkombëtar dhe në ndalimin e qarkullimit ilegal të armëve, municioneve dhe lëndëve eksplozive.