Rasti i Iva Mihailovas: Ministria e Brendshme mohon kalimin e kufirit, flet edhe policia bullgare

Iva Mihailova nga Koçani, e cila ndodhet nën një masë ndalimi aktiv të vendosur nga gjykata, nuk figuron me asnjë dalje të regjistruar zyrtarisht nga territori i Maqedonisë së Veriut, sipas të dhënave të siguruara nga verifikimet në sistemin e kontrollit kufitar të Ministrisë së Punëve të Brendshme (MPB). Megjithatë, autoritetet theksojnë se ajo dyshohet të jetë larguar fshehurazi nga vendi dhe të ketë kaluar kufirin në mënyrë ilegale drejt shtetit fqinj. Ndërkohë, vetë Mihailova ka deklaruar se ndodhet në Bullgari, duke pretenduar se në Maqedoninë e Veriut është përndjekur për shkak të përkatësisë së saj etnike bullgare. Përmes bashkëpunimit përmes Qendrës së Përbashkët të Kontaktit me autoritetet bullgare, Policia Kufitare e Bullgarisë ka realizuar kontrolle shtesë, prej nga është konfirmuar se ajo nuk ka asnjë regjistrim për hyrje të ligjshme në territorin e Republikës së Bullgarisë, njoftoi MPB-ja gjatë pasdites. Sipas regjistrave zyrtare kufitare, hyrja e fundit e regjistruar e Mihailovas në Bullgari daton në muajin shtator 2025, ndërsa në tetor të po këtij viti është shënuar kthimi i saj zyrtar, respektivisht hyrja në Maqedoninë e Veriut. Iva Mihailova, e cila poseduje gjithashtu shtetësi bullgare, po përballet me akuza penale para drejtësisë maqedonase në lidhje me një aksident trafiku me pasoja fatale. Ngjarja ka marrë vëmendje pasi raportimet e paraqitura më parë në media sugjeronin se ajo kishte lëshuar vendin dhe ndodhej tashmë në territorin bullgar.