Seanca plenare e së enjtes: Përballë ligjeve kyçe, integrimit evropian dhe sfidave legjislative

Kuvendi i Kosovës do të mblidhet në seancë plenare të enjten, më 15 tetor, siç u vendos gjatë mbledhjes së Kryesisë të mbajtur të hënën. Kjo do të jetë seanca e parë e këtij institucioni pas zgjedhjes së presidentit, e cila u zhvillua më 6 tetor. Gjatë një deklarimi për media, shefja e Grupit Parlamentar të Lëvizjes Vetëvendosje, Arbërie Nagavci, bëri të ditur se në rendin e ditës për seancën e ardhshme do të përfshihen disa projektligje të rëndësishme, ndër të cilat veçohet nisma për anëtarësimin e Kosovës në Zonën Unike të Pagesave në Euro (SEPA). “Do të bëhet përzgjedhja e dy anëtarëve të Bordit Joekzekutiv të BQK-së. Po ashtu, edhe formimi i komisioneve për zgjedhjen e anëtarëve të Bordit të RTK-së. Po ashtu, u pajtuam që në këtë seancë të përfshihet edhe shqyrtimi në lexim të dytë i ligjit për parandalimin dhe luftimin e pastrimit të parave dhe luftimin e terrorizmit”, potencoi Nagavci. Në anën tjetër, nënkryetarja e Kuvendit nga radhët e Partisë Demokratike të Kosovës, Vlora Çitaku, vuri në pah se në tryezën e Kryesisë u diskutua gjithashtu edhe agjenda e diplomacisë parlamentare. Ajo theksoi se për PDK-në dhe vetë Kuvendin e Kosovës, vëmendje e veçantë duhet t'i kushtohet procesit të Apelit në Hagë dhe synimit për anëtarësim në Këshillin e Evropës. “Një ndër pikat që diskutuam sot ishte edhe agjenda e diplomacisë parlamentare. Për PDK-në dhe krejt Kuvendin e Kosovës, siç jemi shprehur me deklaratën që kemi miratuar, dy gjëra janë të rëndësisë së veçantë: procesi i Apelit në Hagë dhe Këshilli i Evropës”, u shpreh ajo. Ndërkaq, shqetësime lidhur me dinamikën e punës ngriti shefi i Grupit Parlamentar të Aleancës për Ardhmërinë e Kosovës, Besnik Tahiri, i cili u ndal te numri i madh i projektligjeve që presin miratim deri në përfundim të këtij viti. Sipas tij, agjenda legjislative përfshin mbi 60 ligje, çka sipas tij kërkon një qasje shumë më të kujdesshme në shqyrtimin dhe miratimin e tyre. Tahiri shtoi gjithashtu se Kuvendi mbart mbi supe edhe përgjegjësinë për përmbushjen e zotimit shtetëror që ka të bëjë me mbështetjen e ish-krerëve të Ushtrisë Çlirimtare të Kosovës, duke nënvizuar se kjo çështje kërkon maturi dhe trajtim të mirëmenduar, pa u ngutur. “Problemi thelbësor që ne si grup e kemi adresuar është që kemi një agjendë legjislative që është grumbull i ligjeve dhe këtë vit duhet diku mbi 60 ligje të kalojnë. Qysh ka mundësi këto 60 ligje në këtë kohë me prodhu një drejtim strategjik? Ky është një problem thelbësor që do të adresohet në Kuvend... Është detyrë primare e Kuvendit, për shkak se Kuvendi ka miratuar një zotim shtetëror për të ndihmuar në mbrojtjen e çlirimtarëve, mirëpo kjo nuk do të bëhet shpejt. Duhet bërë bukur kujdesshëm”, deklaroi Tahiri.