LSDM akuzon OBRM-PDUKM-në për premtime boshe: Premtojnë pagë 1.000 euro, ndërsa bllokuan minimalen prej 600 eurosh

Lidhja Socialdemokrate (LSDM) ka reaguar ashpër ndaj premtimeve të fundit të OBRM-PDUKM-së për një pagë mesatare prej 1.000 eurosh, duke i quajtur ato përralla dhe mashtrime për opinionin publik. Nga kjo parti hedhin poshtë këto pretendime, duke kujtuar se premtimet për standarde të larta evropiane nuk përkojnë me realitetin e krijuar nga opozita dhe veprimet e tyre në institucione. Sipas LSDM-së, hipokrizia e partive politike u dëshmua qartë në Kuvend, ku u rrëzua iniciativa për rritjen e të ardhurave bazë të punëtorëve. "Paga minimale prej 600 eurosh u refuzua në Kuvend. LSDM solli ligjin, por OBRM-PDUKM nuk e votoi, 'E Majta' nuk u paraqit në sallë, kurse ZNAM zgjodhi të mos votojë", thuhet në reagimin zyrtar, ku shtohet se subjektet e tjera politike dështuan të mbrojnë interesat e punëtorëve. Gjendja ekonomike e qytetarëve mbetet alarmante, paralajmërojnë socialdemokratët. Statistikat tregojnë se dy paga minimale nuk mjaftojnë më as për shportën e reduktuar të qeverisë. Kur llogariten shpenzimet e qirasë dhe shporta sindikale, kostoja e jetesës kalon shifrën e 90.000 denarëve, ndërkohë që çmimet e derivateve dhe produkteve bazë kanë shënuar rritje drastike, duke lënë familjet pa mjetet elementare për mbijetesë. Nga LSDM theksojnë se një pagë mesatare prej një mijë eurosh nuk mund të realizohet vetëm përmes deklaratave politike, por kërkon veprime konkrete. Këto përfshijnë rritjen e pagës minimale, lehtësimin e barrës financiare të familjeve dhe zbatimin e masave që vetë LSDM-ja i pati propozuar që në nisje të krizës ekonomike, të cilat u hodhën poshtë nga mazhoranca aktuale. "Nuk ka 600 euro, por ka premtime për një mijë. Nuk ka rrogë reale, ka vetëm pasiguri. Përrallat e pushtetit nuk kanë fund, ndërsa faturën e rëndë të krizës vazhdojnë ta paguajnë qytetarët e thjeshtë", përfundon reagimi i LSDM-së.