Tragjedia në Fushë-Krujë: Si ndodhi aksidenti fatal me ashensor që i mori jetën 16-vjeçarit gjatë punës

Detaje të reja tronditëse kanë dalë në dritë lidhur me ngjarjen e rëndë të regjistruar në fshatin Arrameras të Fushë-Krujës, ku humbi jetën 16-vjeçari Enes Isaku, pasi kabina e ashensorit u shkëput në ambientet e restorantit ku ai ishte i punësuar si kamerier. Sipas hetimeve paraprake, tragjedia ka ndodhur gjatë një momenti loje mes viktimës dhe kolegut të tij, Endri Stafuka. I mituri kishte hyrë brenda ashensorit për t'u zhvendosur në katin përdhes të subjektit, kur dyshohet se bashkëpunëtori i tij e ka shtyrë lehtësisht dhe ka aktivizuar komandën e zbritjes. Në atë çast, mekanizmi i ashensorit ka pësuar shkëputje të papritur, duke bërë që 16-vjeçari të pësojë goditje fatale në kokë ndaj pllakave, e cila i ka shkaktuar vdekjen e menjëhershme. Nga dinamika e ngjarjes rezulton se rreziku për jetën ka qenë i lartë edhe për vetë kamerierin tjetër. Ndërkohë, është zbuluar se vetëm pak minuta para aksidentit tragjik, i njëjti ashensor ishte përdorur nga pronari i biznesit, Afrim Vathi, i cili është gjyshi i djaloshit të ndjerë. Në vijim të veprimeve hetimore, strukturat e policisë kanë vënë në pranga 26-vjeçarin Endri Stafuka, i akuzuar për veprën penale të “Vrasjes nga pakujdesia”, si dhe pronarin 62-vjeçar, i cili ngarkohet me përgjegjësi për shkelje të rregullave të sigurisë në punë dhe fshehje të të ardhurave. Autoritetet kompetente po vijojnë hetimet intensive për të zbardhur plotësisht shkaqet dhe për të përcaktuar nivelin e përgjegjësisë mbi funksionimin e pajisjes.