Gjyqi ndaj Nagip Krasniqit dhe Isuf Zejnës: Dejona Mihali paraqitet në seancë si dëshmitare

Në Gjykatën Themelore në Prishtinë ka nisur seanca gjyqësore ndaj ish-kryeshefit të Korporatës Energjetike të Kosovës (KEK), Nagip Krasniqi, dhe Isuf Zejna, ku po diskutohen akuzat për keqpërdorim të detyrës zyrtare. Në këtë seancë të së hënës, në cilësinë e dëshmitares po merr pjesë koordinatorja për komitete e Lëvizjes Vetëvendosje, Dejona Mihali. Përveç Krasniqit dhe Zejnës, në këtë proces penal ka qenë i akuzuar edhe Ymer Dragusha. Megjithatë, pasi ky i fundit arriti një marrëveshje për pranimin e fajësisë, mori statusin e dëshmitarit bashkëpunues. Dragusha tashmë është dënuar me 2 vjet burgim për veprën penale të keqpërdorimit të detyrës zyrtare. Sipas aktakuzës, të pandehurit ngarkohen se i kanë shkaktuar buxhetit të shtetit një dëm që llogaritet rreth 37 milionë euro. Sipas dokumentit të prokurorisë, Nagip Krasniqi dyshohet se në cilësinë e personit zyrtar ka nxjerrë fshehtësi zyrtare lidhur me procedurat e prokurimit që po zhvilloheshin në kuadër të KEK-ut, duke i ndarë ato informacione me një person jozyrtar, konkretisht me Dejona Mihalin. Më tej, aktakuza ngarkon Nagip Krasniqin si ish-kryeshef të KEK-ut, Ymer Dragushën në cilësinë e ushtruesit të detyrës së drejtorit të zyrës së prokurimit, si dhe Isuf Zejnën në cilësinë e përfaqësuesit të kompanisë “Rexhepi Zeqiri Zejna L.L.C”, se përmes veprimeve të tyre kanë dëmtuar buxhetin shtetëror për rreth 37 milionë euro. Lidhur me këtë çështje, më 23 prill 2025, Gjykata Themelore në Prishtinë pati marrë një vendim përmes të cilit kishte aprovuar pjesërisht kërkesën e mbrojtjes për hudhjen e aktakuzës ndaj ish-kryeshefit Krasniqi, duke e pushuar procedurën penale për veprën “Zbulimi i fshehtësisë zyrtare”. Ndërkaq, për pikat e tjera, veprat penale ishin rikualifikuar në një vepër penale të vazhduar të “Keqpërdorimit të detyrës zyrtare”. Mirëpo, situata ndryshoi kur Gjykata e Apelit prishi vendimin e shkallës së parë, duke vendosur që procedura ndaj ish-kryeshefit të KEK-ut të vazhdojë për pesë vepra penale të “Keqpërdorimit të detyrës zyrtare” – katër prej tyre në bashkëkryerje – si dhe për një vepër penale të “Zbulimit të fshehtësisë zyrtare”, konfirmuar tashmë sipas aktakuzës së Prokurorisë Speciale. Në seancën fillestare të zhvilluar më 7 shkurt 2025, si Krasniqi ashtu edhe Zejna ishin deklaruar të pafajshëm për akuzat që u rëndojnë. Edhe pse në këtë dosje fillimisht bënte pjesë edhe Ymer Dragusha, ai zgjodhi të bashkëpunojë me drejtësinë përmes një marrëveshjeje për pranim fajësie. Prokuroria Speciale e Republikës së Kosovës (PSRK) kishte ngritur aktakuzën e re më 30 dhjetor 2024 ndaj Nagip Krasniqit, Ymer Dragushës dhe Isuf Zejnës. Derisa Krasniqi dhe Dragusha u akuzuan për “Keqpërdorim të detyrës zyrtare” (me Krasniqin që ngarkohet edhe për “Zbulim të fshehtësisë zyrtare”), Isuf Zejna akuzohet për veprën penale “Ndihmë në kryerjen e veprës penale të keqpërdorimit të detyrës zyrtare”.