Goditet me biçikletë 40-vjeçari në Berat, drejtuesi i mjetit arratiset nga vendi i ngjarjes

Një aksident i rëndë ka ndodhur gjatë mbrëmjes së djeshme (11 tetor) përgjatë aksit nacional Berat–Ura e Kuçit, konkretisht në territorin e fshatit Poshnje. Një automjet ka goditur një qytetar 40-vjeçar që po udhëtonte me biçikletë, duke e lëshuar atë në rrugë dhe duke u larguar menjëherë drejtim i panjohur. Fakti i rëndë është zbuluar nga kalimtarë të rastit, të cilët kanë konstatuar viktimën e aksidentit të shtrirë në asfalt dhe kanë dhënë alarmin duke njoftuar menjëherë strukturat e rendit dhe autoambulancën. Pas ndërhyrjes së parë mjekësore në Spitalin Rajonal të Beratit, gjendja shëndetësore e të plagosurit, të indentifikuar me inicialet E.S., ka kërkuar një kujdes më të specializuar, çka ka detyruar transferimin e tij urgjent drejt Spitalit të Traumës në kryeqytet. Menjëherë pas njoftimit, shërbimet policore janë paraqitur në vendin e ngjarjes për të nisur hetimet paraprake dhe për të dokumentuar provat materiale që do të ndihmojnë në zbardhjen e plotë të dinamikës. Paralelisht, uniformat blu kanë siguruar dhe sekuestruar regjistrimet e kamerave të sigurisë nga subjektet private dhe banesat përgjatë këtij segmenti rrugor. Ky veprim synon identifikimin e shpejtë të automjetit përgjegjës dhe kapjen e shoferit, i cili nuk respektoi detyrimin ligjor për t'i dhënë ndihmën e parë personit të lënduar. Grupi hetimor vijon punën intensive për zbardhjen e plotë të rrethanave.