“Kam shumë për të thënë”: Ish-ministri Saimir Tahiri paralajmëron një rikthim përmes një videoje enigmatike

“Disa histori i kam jetuar. Disa të tjera i kam dëgjuar të tregohen për mua”. Me këto fjalë, ish-ministri Saimir Tahiri ka shoqëruar një video të publikuar së fundmi në profilin e tij zyrtar në rrjetet sociale, duke ngjitur kuriozitetin e ndjekësve. Në mesazhin që shoqëron pamjet, ai shton: “Do shihemi së shpejti. Ka kaq shumë për të thënë”, duke lënë të kuptohet se një projekt apo rrëfim i ri është në prag. Në videon e shpërndarë, Tahiri shfaqet i rrethuar nga një ekip xhirimi gjatë momenteve të provave. Ambienti dhe dinamika ngjasojnë ose me xhirimet e një prodhimi kinematografik, ose me prapaskenat e një interviste të gjerë televizive. Duket se ish-zyrtari i lartë ka zgjedhur një qasje krejtësisht të re për të ndarë me publikun copëza nga jeta e tij dhe ngjarjet që e kanë shoqëruar, një rrëfim paralajmërues që pritet të zbardhet plotësisht në ditët në vijim.