Kurti në 26-vjetorin e masakrës në Abri: Zbardhja e drejtësisë mbetet borxh i pashlyer ndaj viktimave

Kryeministri në detyrë i Kosovës, Albin Kurti, ka përkujtuar 23 anëtarët e familjes Deliu nga Abria e Epërme e Drenasit, të cilët u ekzekutuan barbarisht më 26 shtator 1ং98. Duke evokuar këtë ngjarje të rëndë, kreu i ekzekutivit theksoi se mizoritë e ushtruara ndaj familjes Deliu përbëjnë dëshmi të qarta të krimeve të luftës, krimeve kundër njerëzimit dhe gjenocidit të shtetit serb në Kosovë. Ai gjithashtu u ndal te masakra e kryer në të njëjtën ditë në fshatin Gollubovc të Malishevës, ku u vranë civilë të pafajshëm shqiptarë. “Drejtësia është detyrim dhe më e pakta që duhet bërë për viktimat dhe familjet”, ka deklaruar Kurti, duke bërë thirrje për një presion më të madh ndërkombëtar mbi Serbinë. Kujtesa historike përfshin fatin tragjik të secilit viktimë: nga foshnja në barkun e nënës Luljetë, e cila kishte parashikuar ta quante Malësor ose Malësore; Mihanja, e cila vetëm një ditë më parë kishte mbushur 28 vjeç, bashkë me djalin e saj Valmirin që kishte vetëm pesë ditë që kishte mbushur dy vjet; Lumnija dhe foshnja e saj gjashtëditëshe, Dituria, e cila i mbijetoi fillimisht masakrës por ndërroi jetë 54 ditë më vonë; dy adoleshentet Antigona dhe Mihanja, 14 dhe 16 vjeçe; e deri te anëtari më i moshuar i familjes, Fazli Deliu, 94 vjeç. Përmasat dhe natyra çnjerëzore e kësaj ngjarjeje dëshmojnë mizorinë e aparatit shtetëror serb. Ndër aktet më makabre ishin prerja e barkut të një gruaje shtatzënë, vrasja e nënave bashkë me fëmijët e tyre të mitur, dhunimi dhe masakrimi i dy vajzave të reja, si dhe gjymtimi i kufomave pas ekzekutimit me plumb në kokë. Këto krime dëshmojnë urrejtjen e ushqyer ndër dekada nga strukturat akademike dhe politike të Serbisë. Në po të njëjtën datë, më 26 shtator 1998, forcat e armatosura të Serbisë kryen një tjetër masakër në Gollubovc të Malishevës, ku civilët shqiptarë u lidhën, u torturuan dhe u ekzekutuan. Duke riafirmuar se vënia e drejtësisë në vend është një detyrim moral e institucional, Kurti theksoi domosdoshmërinë e shtimit të trysnisë ndërkombëtare ndaj Serbisë. Lavdi e përjetshme të gjithë dëshmorëve dhe martirëve të rënë për lirinë e Kosovës!