Kryediplomati shqiptar i kundërvihet ashpër Daçiqit: Retorika nxitëse është rrezik real, Tirana do të jetë gjithmonë krah Kosovës

Ministri i Punëve të Jashtme i Shqipërisë, Ferit Hoxha, ka reaguar ashpër ndaj deklaratave nxitëse të ish-kryediplomatit serb, Ivica Daçiq, i cili gjatë fushatës së tij zgjedhore lëshoi paralajmërime se flamuri i Serbisë do të valëvitet sërish mbi Prizren. Nëpërmjet një postimi në platformën X, shefi i diplomacies shqiptare ka vlerësuar se një gjuhë e tillë agresive nuk mund të kalojë pa u vënë re, pasi ekziston rreziku konkret që ajo t'u japë guxim elementëve ekstremistë për të ndërmarrë veprime të rrezikshme në terren. Duke e sjellë në vëmendje sulmin e armatosur në Banjskë të Zveçanit, ai ritheksoi se drejtësia dhe llogaridhënia e plotë për atë ngjarje ende mungojnë. Hoxha ka theksuar se e ardhmja e rajonit kërkon fqinjësi të mirë, bashkëpunim dhe pajtim të sinqertë, por ka paralajmëruar se nuk mund të ketë stabilitet për sa kohë që mohohen realitetet, cenohet legjitimiteti i fqinjëve dhe përdoren kërcënimet për përfitime të ngushta politike. Sipas tij, Ballkani Perëndimor e njeh mirë koston e nacionalizmit dhe përçarjes, prandaj mësimet e së kaluarës nuk duhet të harrohen dhe aq më pak të përsëriten. Ai e cilësoi Republikën e Kosovës si një realitet të pakthyeshëm dhe shtet sovran e demokratik, i cili përfaqëson një shtëpi të sigurt për të gjithë qytetarët e saj pa dallim. Në këtë linjë, ministri Hoxha ka garantuar se Shqipëria do të vazhdojë të qëndrojë palëkundur përkrah Kosovës, duke e mbështetur atë në çdo hap dhe drejtim, si një garanci për paqen, sigurinë dhe të ardhmen e përbashkët evropiane të rajonit.