Austria në alarm para përballjes me Kosovën, Rangnick zbulon sfidën kryesore në Vjenë

Përzgjedhësi i Përfaqësueses së Austrisë, Ralf Rangnick, ka analizuar forcën e Kosovës në prag të ndeshjes së vlefshme për Ligën e Kombeve, ndërkohë që ka ruajtur misterin rreth portierit titullar që do të zbresë në fushë. Austria e ka nisur këtë cikël garues me një fitore 3:1 ndaj Izraelit, ndërsa synon triumfin e radhës të dielën, nga ora 18:00, në stadiumin e stërmbushur “Ernst-Happel” në Vjenë, ku do të përballet me Kosovën, e cila drejtohet nga ish-trajneri austriak, Franco Foda. “Kosova është e mirë. Mendoj se kjo ndeshje do të jetë më e vështirë se ajo kundër Izraelit. Ndeshja e tyre kundër Irlandës (1:0) mund të kishte përfunduar me një fitore edhe më të thellë”, u shpreh numri një i stafit teknik austriak, duke shtuar se “Dardanët” shquhen për disiplinë të lartë taktike, kompaktësi dhe mungesë hapësirash për kundërshtarin: “Do të na kërkojnë shumë. Ata kanë pak hapësira”. Pavarësisht vështirësive që paraqet ky duel, Rangnick ka bërë të qartë synimin e qartë të skuadrës së tij: “Ne duam ta marrim ndeshjen në kontrollin tonë. Nëse e bëjmë këtë, atëherë pozita jonë për dy ndeshjet e ardhshme jashtë fushe do të jetë shumë e mirë”. Në këtë mision, Austria pritet të paraqitet pa kapitenin e ri, Michael Gregoritsch, nga minuta e parë. Sulmuesi ka pësuar një lëndim në sfidën kundër Izraelit; ndonëse dëmtimi nuk është shqetësues, ai pritet ta nisë takimin nga stolitë rezervë. Lidhur me këtë situatë, Rangnick deklaroi: “Duhet të presim edhe sot dhe nesër. Nuk ka asgjë të dëmtuar rëndë, por vendimin do ta marrim nesër”. Si pasojë e kësaj, shiriti i kapitenit do i besohet Xaver Schlager. Përveç kësaj, strategu austriak ka preferuar të mos e zbulojë formacionin e plotë, duke krijuar dilema sidomos për pozitën e portierit titullar, teksa ka konfirmuar vetëm se Alexander Schlager nuk do të jetë ndërmjet shtyllave, duke refuzuar të jep detaje të tjera me fjalët: “Nuk do t'i zbulojmë të gjitha letrat”. Megjithatë, përmes një buzëqeshjeje, ai la të kuptohet se vendin e portierit do ta zërë një lojtar i ri. Kjo lë të hapur mundësinë që kandidatët të jenë Lukas Jungwirth i LASK-ut ose Christian Zawieschitzky i Red Bull Salzburgut. Gardiani që do të aktivizohet kundër Kosovës më pas parashikohet t'i bashkohet përfaqësueses U21 të Austrisë për t'i dhënë mbështetje shtesë, skenar ky që mund të ndodhë edhe me mesfushorin Vasilije Markoviq të Austria Vjenës.