Provokim në Prizren: Politikan serban xhiron video propagandistike për fushatë ndërsa Prishtina hesht

Politikani nacionalist serb, Milosh Jovanoviq, ka ndërmarrë një vizitë në qytetin e Prizrenit, ku ka realizuar një material video për fushatën e tij zgjedhore, duke përhapur sërish narrativën se “Kosova është Serbi”. Ky veprim ka ndodhur në një kohë kur autoritetet e Beogradit vijojnë të bllokojnë lëvizjen e zyrtarëve nga Kosova drejt Luginës. Jovanoviq, i cili udhëheq subjektin e djathtë “Novi DSS” dhe është bartës i listës zgjedhore “Autentična Desnica”, e ka shfrytëzuar këtë ndalesë në Prizren për të sfiduar hapur rendin kushtetues të shtetit tonë. Nëpërmjet një videoje të shpërndarë në platformën TikTok, ai e ka cilësuar Prizrenin si pjesë të Serbisë, duke e shoqëruar postimin me mbishkrimin se “E drejta autentike në Prizren, Kosovë, është Serbia”. Sipas burimeve mediatike në gjuhën serbe, Jovanoviq është referuar ndaj Prizrenit si një nga qytetet më të rëndësishme historike serbe, duke përmodernizuar terminologjinë mesjetare dhe duke insistuar se territori i Kosovës i takon Serbisë. Megjithatë, kjo vizitë ngre dilema të mëdha rreth mënyrës se si ai ka depërtuar deri në Prizren dhe nëse ka siguruar ndonjë autorizim nga institucionet kompetente për hyrjen e shtetasve të huaj, ndërkohë që ende mungon një komunikatë zyrtare sqaruese. Kontrasti i kësaj vizite bëhet edhe më i mprehtë kur vendoset krahas ngjarjeve të 9 tetorit. Atë ditë, një delegacion i përbërë nga deputetet e Kuvendit të Kosovës, Arbërie Nagavci, Fatmire Mullhaxha-Kollçaku dhe Liza Gashi, si dhe ambasadori Jetish Jashari e këshilltari Ragmi Mustafi, u ndaluan në mënyrë arbitrare nga autoritetet kufitare serbe. Ata u bllokuan për disa orë në pikën e kalimit në Depcë, duke u pamundësuar shkuarjen në Preshevë për t'i shprehur ngushëllime familjare kryetares Ardita Sinani pas humbjes së babait të saj, dhe përfundimisht u detyruan të realizonin një takim vetëm në territorin e Kosovës. Derisa përfaqësuesve institucionalë të Kosovës u mohohet një vizitë me natyrë njerëzore dhe familjare në Luginë, një figurë politike nga Serbia shfrytëzon pa pengesa hapësirat e vendit tonë për të prodhuar materiale propagandistike me pretendime territoriale. Tashmë mbetet për t'u parë nëse organet shtetërore kanë qenë në dijeni të kësaj lëvizjeje dhe nëse do të ketë një reagim institucional ndaj këtyre provokimeve haptazi nacionaliste.