Tragjedi në det pranë Xhibutit: Mbi 100 emigrantë humbin jetën pas përmbysjes së varkës

Një tragjedi e rëndë detare ka goditur brigjet e Xhibutit, ku të paktën 109 emigrantë kanë ndërruar jetë dhe 116 të tjerë janë ende të zhdukur, pasi mjeti i tyre lundrues u përmbys gjatë udhëtimit drejt Jemenit. Shifrat tragjike u konfirmuara zyrtarisht nga Organizata Ndërkombëtare për Migracionin (IOM), e cila bëri të ditur se në mesin e viktimave janë identifikuar 52 burra, 42 gra dhe 15 fëmijë. Duke folur për situatën në terren, Alexandre Coissac, drejtues i IOM-it në këtë shtet të Afrikës Lindore, theksoi se ekipet e emergjencës po bashkëpunojnë ngushtë me autoritetet vendase për të dhënë ndihmën e nevojshme. "Kjo ngjarje e rëndë shërben si një thirrje alarmi për rreziqet ekstreme me të cilat përballen njerëzit në këtë korridor të rrezikshëm migracioni, në përpjekje për një të ardhme më të sigurt ekonomike," u shpreh ai. Sipas dëshmive të të mbijetuarve, aksidenti ndodhi mbrëmjen e së enjtes pranë zonës së Guhere, në veri të qytetit Obock. Fatmirësisht, më shumë se 80 persona, kryesisht shtetas nga Etiopia, arritën t'i shpëtonin vdekjes dhe të mbijetonin nga ky incident tragjik. Xhibuti shërben si një prej nyjave kryesore të nisjes për individët që synojnë të kalojnë drejt Gadishullit Arabik. Rruga tradicionale e emigrantëve, që vijnë kryesisht nga Somalia dhe Etiopia, kalon përmes ngushticës së rrezikshme Bab el-Mandeb për në Jemen, nga ku më pas shumë prej tyre përpiqen të depërtojnë në vendet e Gjirit, si Arabia Saudite, Emiratet e Bashkuara Arabe apo Omani, në kërkim të një jete më të mirë.