Atentati në Gjirokastër: Autorët ndoqën shënjestrën për 3 kilometra, eksplozivi u detonua me telekomandë

Dalin në dritë detaje tronditëse nga ngjarja e rëndë kriminale e regjistruar mbrëmjen e së shtunës në Gjirokastër, ku si pasojë e një sulmi me lëndë plasëse humbi jetën në spital Beqir Devolli, i njohur ndryshe me nofkën ‘Çilo’, ndërsa mbeti i plagosur Erigers Mela. Sipas të dhënave paraprake nga grupi hetimor, mekanizmi shpërthyes është vënë në lëvizje në distancë përmes një telekomande. Autori i dyshuar thuhet se e ka survejuar viktimën hap pas hapi për rreth 3 kilometra, duke nisur nga zona e Viroit e deri në vendin ku u regjistrua shpërthimi shkatërrues. Hetuesit kanë zbuluar se pak para atentatit, Beqir Devolli kishte pirë kafe me një mikun e tij dhe më pas ishte ulur në automjet. Vetëm pak çaste më vonë, makina u përfshi nga flakët dhe shpërthimi i fuqishëm, i cili rezultoi fatal për Devollin dhe shkaktoi plagosjen e Melës. Referuar burimeve zyrtare, të dy personat kishin qenë më herët cak i kërcënimeve direkte përmes telefonit. Ndërkohë, një vit më parë, automjeti i Erigers Melës ishte shkrumbuar nga zjarri në një ngjarje që dyshohet se ka shërbyer si paralajmërim. Nga ana tjetër, Beqir Devolli kishte kaluar një periudhë dyvjeçare nën masën e sigurisë “arrest shtëpie” në kryeqytet. Një aspekt tjetër që po analizohet me kujdes nga autoritetet është fakti se sulmi ndodhi në afërsi të menjëhershme të komisariatit të policisë. Hetuesit dyshojnë se ekzekutorët kanë pritur momentin e përshtatshëm kur rruga të ishte e boshatisur për të shtypur butonin e telekomandës. Grupi i posaçëm hetimor po verifikon gjithashtu mundësinë e një lidhjeje të mundshme mes këtij atentati dhe ekzekutimit të Artan Myrtajt, ngjarje e ndodhur afërsisht dy javë më parë në qytetin e Sarandës. Aktiviteti hetimor vijon intensivisht në disa drejtime, me qëllim identifikimin dhe kapjen e autorëve, zbardhjen e plotë të motiveve të krimit, si dhe verifikimin e pistave të mundshme kriminale.