Drama në Baku: George Russell triumfon pas një beteje të ethshme ndaj Max Verstappen

Piloti i skuderia Mercedes, George Russell, ka rrëmbyer fitoren në Çmimin e Madh të Azerbajxhanit në Formula 1, garë e zhvilluar në qarkun urban të Bakusë. Britaniku siguroi një triumf rrëqethës, duke lënë pas me vetëm një të dhjetën e sekondës rivalin e tij Max Verstappen, i cili u rendit i dyti me Red Bull. Megjithëse e kontrolloi garën që nga xhiroja hapëse e deri në atë përmbyllëse, Russell u vu para rrezikut për të humbur kreun në fazën e fundit për shkak të rrethanave të papritura. Me këtë sukses, ai ka ngushtuar në 66 pikë diferencën në klasifikim ndaj shokut të tij të skuadrës, Kimi Antonelli. Shkallët e podiumit u plotësuan nga Isack Hadjar, i cili mori vendin e tretë me bolidin e dytë të Red Bull. Pozita e katërt i theu Charles Leclerc me Ferrarin e tij, ndërsa pas tij u pozicionua Antonelli. Piloti italian bëri një paraqitje fantastike, pasi e nisi garën nga vendi i 16-të dhe rikuperoi plot 11 pozicione, duke lënë pas në fund edhe Lewis Hamilton. Britaniku i Ferrarit e mbylli garën i gjashti, ndërsa zona e pikëve u plotësua nga Lindblad, Ocon, Bearman dhe Sainz. Nga ana tjetër, dita ishte për t'u harruar për McLaren, ku Piastri përfundoi i 14-ti pas një gabimi, ndërsa Norris u detyrua të tërhiqej pa e mbyllur dot garën. Në aspektin taktik, ajo që dukej si një fitore e sigurt për Russell, i cili kishte krijuar një epërsi deri në 10 sekonda, u shndërrua në një përballje të ashpër "rrotë më rrotë" me Verstappen drejt fundit. Hyrja në pistë e makinës së sigurisë, 16 xhiro para finishit, fshiu të gjithë avantazhin e krijuar dhe e detyroi britanikun të luftonte nga e para. Edhe në metrat e fundit, flamujt e verdhë i dhanë një avantazh Verstappen, i cili e preku vijën e finishit vetëm një të dhjetë sekonde larg fituesit. Ndërkohë, Ferrari nuk mundi të përfshihej në betejën për podium, ndërsa Antonelli arriti të nxjerrë maksimumin e mundshëm nga një garë e nisur nga fundi i grilës.