Tragjedi në Athinë: Gjashtë viktima pas shembjes së një ndërtese nga shpërthimi i fuqishëm

Një ngjarje e rëndë ka ndodhur në kryeqytetin grek, ku gjashtë persona kanë humbur jetën pasi një ndërtesë banimi dykatëshe u shemb plotësisht si pasojë e një shpërthimi, për të cilin autoritetet vendase dyshojnë se lidhet me rrjetin e gazit. Zëdhënësi i brigadës së zjarrfikësve, Vassilis Vathrakogiannis, konfirmoi gjatë një paraqitjeje televizive se ekipet e shpëtimit, të pajisura me mjete të rënda, qen specialë, kamera dhe sensorë, arritën të nxjerrin nga gërmadhat trupat e pajetë të gjashtë viktimave. Aksioni i kërkim-shpëtimit u fokusua te një çift i moshuar që banonte në godinë, si dhe te katër turistë të huaj që po qëndronin në një apartament tjetër, ndërkohë që zjarrfikësit dhe njësitë e hetimit nisën menjëherë verifikimet në terren për të zbardhur shkaqet e sakta të ngjarjes, në një zonë të njohur me hotele dhe bujtina. Sipas burimeve policore, katër turistët – dy çifte amerikane – kishin planifikuar të linin dhomën për të udhëtuar drejt aeroportit të Athinës pasditen e së premtes, por ata nuk u paraqitën kurrë në fluturimin e tyre. Ndërkohë, autoambulancat qëndruan në gadishmëri gjatë gjithë ditës së shtunë për transportimin e viktimave drejt morgut për procedurat e identifikimit. Shpërthimi i fuqishëm ndodhi në zonën historike të Plakës, në afërsi të monumenteve kryesore si Akropoli dhe Tempulli i Zeusit. Përveç shkatërrimit të plotë të ndërtesës, forca e shpërthimit dëmtoi rëndë edhe banesa, dyqane e automjete përreth, duke shpërndarë copëza xhamash dhe mbeturina deri në tri blloqe larg.