Deçani triumfon në udhëtim ndaj Llapit, Prishtina bind ndaj Rahovecit në Superligën e Kosovës

Në kuadër të xhiros së tretë të Superligës së Kosovës në hendboll, palestrën “Hakif Zejnullahu” në Podujevë e ka karakterizuar një përballje mjaft interesante ndërmjet Llapit dhe Deçanit, e cila u zhvillua të shtunën. Pjesa më e madhe e takimit u karakterizua me një lojë të fortë dhe rivalitet të lartë në fushë. Megjithatë, mysafirët nga Deçani ngritën ritmin në çerekun e fundit të sfidës, duke arritur të shkëputen dhe të sigurojnë një fitore bindëse me rezultatin 36:28. Pjesa e parë ishte tejet e barabartë, ku deçanasit kishin krijuar një epërsi minimale prej vetëm dy golash, duke mbyllur 30-minutëshin e parë me shifrat 16:14. Në aspektin individual, Arbios Mushkolaj udhëhoqi Deçanin drejt këtij triumfi si golashënuesi më i dalluar me 10 finalizime të sakta, i ndjekur nga Egzon Gjuka me gjashtë dhe Florent Mavraj me pesë gola. Ndërkaq, te skuadra e Llapit më efikasët në fushë rezultuan Victor Rios Ramirez dhe Machado Da Rosa, të cilët kontribuan secili nga gjashtë herë në listën e golashënuesve. Po gjatë ditës së shtunë, një tjetër ndeshje e kësaj xhiroje solli fitoren e thellë të Prishtinës kundër Rahovecit me rezultatin 42:29. Kryeqytetasit u udhëhoqën drejt kësaj fitoreje nga Enis Kuleta, i cili shkëlqeu me 12 gola, ndërsa te rahovecianët u dalluan Erblin Qerimi, Ardit Dema dhe Amir Fazliu, secili duke realizuar nga shtatë gola. Ndërkohë, kalendari i kësaj xhiroje kompletohet të dielën me supersfidën e madhe ndërmjet Besa Famgasit dhe Kastriotit, e cila është parashikuar të nisë nga ora 16:00.