Ndryshime në Kalanë e Shkupit: Hyrja do të bëhet me biletë pas finalizimit të projekteve rigjeneruese

Vizitorët e Kalasë së Shkupit do të duhet të paguajnë biletë hyrjeje pasi ky monument historik të jetë restauruar plotësisht dhe të vihet në shërbim të publikut. Këtë e ka bërë të ditur kryeministri i Maqedonisë së Veriut, Hristijan Mickoski, duke paralajmëruar nisjen e ndërhyrjeve infrastrukturore gjatë këtij viti. Sipas dinamikës së parashikuar, nëse gjithçka ecën sipas planit, ky lokalitet i rëndësishëm trashëgimie pritet të marrë një dimension dhe pamje krejtësisht të re brenda vitit të ardhshëm, duke u shndërruar në një pikë kyçe për turizmin kryeqytetas. “Është normale që hyrja të paguhet. Jo tani, por kur të hapet, kur të rregullohet, ashtu siç ndodh kudo në botë”, u shpreh kryeministri Mickoski gjatë prononcimit të tij lidhur me këtë nismë. Kreu i ekzekutivit vlerësoi se gjendja ekzistuese, përfshirë edhe peizazhin e deritanishëm hortikulturor, nuk arrin të pasqyrojë dhe të shfrytëzojë si duhet potencialin e plotë të një prej monumenteve më emblematike të kryeqytetit. Për t'i dhënë këtij vendi rëndësinë e merituar, Qeveria do të angazhojë fonde financiare dhe mbështetje logjistike për transformimin e Kalasë në një atraksion turistik të rangut të lartë. Plani strategjik parasheh që ky lokalitet historik të bëhet pjesë integrale e agjendës zyrtare për programin “Shkupi – Kryeqyteti Evropian i Kulturës 2028”.