Humbja në Durrës, trajneri i Skënderbeut, Julian Ahmataj: Ja pse po penalizohemi padrejtësisht

Skënderbeu ka pësuar një tjetër humbje në kampionat, duke u dorëzuar me rezultatin 2-0 përballë Teutës në sfidën e vlefshme për javën e gjashtë të Abissnet Superiores, e cila u zhvillua në stadiumin e Durrësit. Pas përfundimit të këtij dueli, trajneri i skuadrës korçare, Julian Ahmataj, ka analizuar paraqitjen e ekipit të tij përpara mediave, duke u ndalur te vështirësitë me të cilat po ballafaqohet grupi në këtë nisje sezoni. “Do të them vetëm diçka. Të gjitha skuadrat që luajnë përballë nesh marrin karton të kuq. Rezultatet kanë munguar, kjo është e vërtetë. Na bëjnë faulle që nuk ndëshkohen”, u shpreh fillimisht tekniku i bardhekuqve, duke ngritur shqetësimin për trajtimin e arbitrimit. I pyetur mbi ndryshimet e skemave dhe ecurinë e lojës, Ahmataj pranoi se ekipi është përshtatur sipas kushteve dhe nevojave të krijuara: “Keni shumë të drejtë. Të gjitha skuadrat ndryshojnë sisteme loje dhe shfaqen në mënyra të ndryshme, pasi kështu është bërë futbolli modern. Ne kemi përdorur vetëm dy sisteme, të kushtëzuar nga rrethanat. Kemi ndërtuar një skuadër që lojtarët t'i dalin për zot pozicioneve të tyre.” Sipas trajnerit, bashkimi i grupit ku përfshihen lojtarë vendas dhe të huaj kërkon kohën e vet për t'u integruar plotësisht, proces ky që pritet të stabilizohet përfundimisht rreth skemës bazë 4-2-3-1. Duke analizuar efikasitetin në sulm dhe harxhimin e madh të energjive për të gjetur rrugën e rrjetës, kreu i stafit teknik të Skënderbeut vuri theksin te kalendari dhe përbërja e re e grupit: “Po ta shikoni, ne kemi zhvilluar pesë takime në transfertë. Dashje pa dashje, është fillim kampionati dhe kemi të bëjmë me një skuadër të re në këtë kategori, ndaj edhe vështirësitë janë të mëdha. Është çështje kohe dhe besimi, gjëra që do të vijnë duke u përmirësuar gradualisht ndeshje pas ndeshjeje.” Në mbyllje të prononcimit të tij, Ahmataj theksoi se diferencat në renditje mes skuadrave janë minimale, me përjashtim të kryesuesve, megjithatë shqetësimi kryesor mbetet trajtimi i padrejtë disiplinor ndaj ekipi të tij: “Diferenca mes vendeve është vetëm tri pikë, përjashto vendet e para. Unë shoh edhe këtë tjetrën, që skuadrës sonë vazhdojnë t'i dalin lojtarë me karton të kuq.”