Kërkesat për dorëheqje dhe akuza për Specialen, reagon ashpër ministrja Gërvalla

Ministrja e Drejtësisë, Donika Gërvalla, është ballafaquar me pyetjet e gazetarëve gjatë një konference për media, ku është prononcuar lidhur me thirrjet e opozitës dhe protestuesve për largimin e saj nga detyra, si dhe për pretendimet rreth një bashkëpunimi të mundshëm me Gjykatën Speciale. Gërvalla i ka hedhur poshtë këto aludime, duke theksuar se nuk ka pasur dhe nuk ka asnjë lloj ndërlidhjeje, qoftë direkte apo indirekte, me UNMIK-un, EULEX-in apo Gjykatën Speciale. “Janë bërë bajat... sepse i kam shpjeguar disa herë për Specialen”, u shpreh ajo, duke shtuar se deklaratat që e lidhin atë me këto institucione janë përsëritur tej mase. “Nuk ka në asnjë… as me UNMIK-un, as me EULEX-in, as me Gjykatën Speciale, nuk ka asnjë pikë takimi timin, as direkt dhe as indirekt. Mirëpo, edhe pak durim do të kemi sepse aktgjykimi do të vijë shpejt dhe do ta shohim shumë shpejt.” Në këtë linjë, ajo ka përmendur se pret që personat që e kanë etiketuar dhe akuzuar publikisht të ballafaqohen me faktet e vërteta menjëherë pas publikimit të aktgjykimit zyrtar. Lidhur me kritikat se ka ruajtur heshtje institucionale pas vendimit të shkallës së parë ndaj ish-krerëve të UÇK-së, Gërvalla ka bërë të ditur se dikasteri që ajo drejton është angazhuar intensivisht në përgatitjen e hapave vijues. “Për aktgjykimin e Gjykatës, unë nuk kam mbetur e heshtur”, deklaroi ministrja, duke sqaruar se pozicioni qeveritar është bërë i ditur nga kryeministri, ndërkohë që ajo dhe ekipi i saj i janë përveshur punës që në ditën e parë për të ndërtuar një strategji të mirëfilltë, pasi çështja e Gjykatës Speciale përbën një betejë strikt ligjore dhe jo një fushëbetejë deklaratash mediatike. Sipas saj, ekzekutivi mund të ndërmarrë hapa edhe më të gjerë në këtë drejtim, ndërsa aktualisht po bëhet një analizë e hollësishme e rrethanave për të përcaktuar veprimet e ardhshme. “Unë jam e bindur që mund të bëjmë më shumë. Mirëpo, jemi duke i shikuar dhe analizuar të gjitha rrethanat me qëllim që secili në pozicionin e tij, në përgjegjësinë e tij, ta kryejë punën e tij me ndershmëri dhe me azhurnitet”, shtoi ajo. Në pyetjen e drejtpërdrejtë se a ka shqyrtuar mundësinë e dorëheqjes pas protestave të fundit, Gërvalla ka vlerësuar se një kërkesë e tillë përbën një të drejtë legjitime të qytetarëve në një sistem demokratik. “Është e drejtë e secilit qytetar të Republikës së Kosovës të kërkojë dorëheqjen e secilit ministër. Ajo është, më në fund jetojmë në një shtet demokratik ku është e drejtë e secilit të shprehë mendimin e tij. Prandaj nuk e komentoj unë kërkesën për dorëheqje. Nuk është e imja as t’i imponoj dikujt dorëheqjen, por as t’ia ndaloj fjalën askujt”, përfundoi Gërvalla.