Gërvalla: Përgatitjet për betejën ligjore në Hagë nisën qysh në ditën e parë, institucionet po bëjnë më shumë

Ministrja e Drejtësisë, Donika Gërvalla, ka dalë në një prononcim publik për herë të parë pas vendimit dënues të shkallës së parë të Gjykatës së Hagës ndaj ish-krerëve të Ushtrisë Çlirimtare të Kosovës (UÇK). Ajo ka bërë të ditur se ekipi i saj është angazhuar intensivisht që nga dita e parë e mandatit për t'u ballafaquar me këtë proces. Duke iu përgjigjur kritikave për heshtje, Gërvalla theksoi se pozicioni i saj kërkon veprim institucional dhe jo deklarata të nxituara. Ajo shtoi se kryeministri tashmë ka shprehur qëndrimin zyrtar të ekzekutivit, ndërsa vetë ajo është fokusuar te aspekti profesional. Sipas saj, çështja e Gjykatës Speciale kërkon një qasje serioze ligjore dhe jo debate mediatike apo reagime me zë të lartë, duke u përgatitur tashmë për shkallën e ardhshme të gjykimit. Ministrja gjithashtu përmendi se një prej mbrojtësve të të akuzuarve ka vlerësuar se Qeveria nuk ka mundur të bëjë më shumë, por ajo u shpreh e bindur se ekzistojnë hapësira për veprim shtesë, teksa po shqyrtohen me kujdes të gjitha rrethanat e krijuara. Sa i përket thirrjeve të protestuesve për dorëheqjen e saj dhe akuzave të kaluara se gjoja ka dorëzuar dosje në Gjykatën Speciale, Gërvalla i quajtur këto pretendime të konsumuara, duke ritheksuar se nuk ka pasur asnjë lloj lidhjeje, direkte apo indirekte, qoftë me UNMIK-un, EULEX-in apo me Gjykatën Speciale. Në fund, ajo kërkoi edhe pak durim nga qytetarët duke paralajmëruar se aktgjykimi i plotë do të zbardhet së shpejti, ndërsa pati një mesazh të prerë për ata që kanë hedhur akuza ndaj saj, duke thënë se shpifjet e përsëritura duhet t'i bëjnë ata të skuqen para pasqyrës.