Sulmi me thikë në Skenderaj: Vetëdorëzohen dy të dyshuarit, dyshimet e para çojnë te kamerat kundër gjuetisë ilegale

Dy persona që kërkoheshin lidhur me një ngjarje të rëndë të regjistruar më 20 shtator në Skenderaj janë dorëzuar vetë në polici dhe tashmë gjenden nën masën e paraburgimit, teksa ndaj tyre po zhvillohen hetimet me dyshimin për veprën penale “Vrasje në tentativë”. Incidenti ka ndodhur rreth orës 22:20 në pompën e derivateve “Fer Petrol”, e cila ndodhet në rrugën “Azem Bejta”, ku 34-vjeçari J.V. u sulmua fizikisht nga autorët e dyshuar. Sipas të dhënave të siguruara, viktima është goditur fillimisht me thikë në zonën e gjoksit dhe më pas në këmbën e majtë, ndërsa autorët ishin larguar menjëherë nga vendngjarja pas sulmit. I plagosur rëndë, 34-vjeçari ka marrë fillimisht ndihmën e parë mjekësore në Qendrën Kryesore të Mjekësisë Familjare në Skenderaj, për t'u transferuar më pas për trajtim të mëtejshëm mjekësor në Spitalin Rajonal të Mitrovicës së Jugut. Paraprakisht dyshohet se ngjarja ka ndodhur për motive që lidhen me funksionin e viktimës si sekretar i Shoqatës së Gjuetisë “Drenica”. Njëri nga të dyshuarit thuhet se i ishte qasur viktimës për çështjen e vendosjes së kamerave të sigurisë në zona malore, të cilat përdoreshin për të zbuluar dhe dokumentuar rastet e gjuetisë ilegale. Në fazën fillestare të hetimeve, forcat e rendit kryen kontrolle në shtëpitë e të dyshuarve, por ata nuk u patën lokalizuar, ndërsa arma e ftohtë e përdorur në sulm nuk u gjet në vendin e ngjarjes. Për këtë rast është hapur hetim zyrtar për “Vrasje në tentativë”. Në vijim të procesit hetues, dy të dyshuarit, D.G. (41 vjeç) dhe G.A. (43 vjeç), janë paraqitur vetë në Sektorin Rajonal për Hetime. Pas përmbylljes së procedurave policore, ata u dërguan para Gjyqtarit të Procedurës Paraprake pranë Gjykatës Themelore në Mitrovicë, i cili aprovoi kërkesën për caktimin e masës së paraburgimit prej 30 ditësh për secilin prej tyre. Pas vendimit të gjykatës, të dy personat janë transferuar në qendrën përkatëse të paraburgimit.