Formë e shkëlqyer për Ernest Muçin, sulmuesi kuqezi shënon në triumfin e Trabzonsporit

Sulmuesi i Kombëtares së Shqipërisë, Ernest Muçi, ka konfirmuar formën e tij të lartë edhe në skenën e futbollit turk, duke lënë sërish gjurmë me fanellën e klubit të tij në ndeshjen e vlefshme për javën e shtatë të Superligës së Turqisë. Pasi kishte lënë përshtypje shumë pozitive në ndeshjet e fundit me fanellën kuqezi, lojtari ofensiv ka gjetur sërish rrugën e rrjetës, duke i dhënë një kontribut vendimtar skuadrës së tij në triumfin e arritur në udhëtim kundër Samsunsporit me shifrat 3:0. Momenti vendimtar i takimit u regjistrua në minutën e 28-të. Muçi tregoj instinktin e golashënësit brenda zonës, duke shfrytëzuar në maksimum një asistim të dhuruar nga Mustafa Eskihellaç dhe me një ekzekutim të saktë e dërgoi topin në rrjetë për të zhbllokuar shifrat në 1:0. Ky gol i sulmuesit shqiptar i dha qetësi Trabzonsporit, i cili më pas menaxhoi me sukses rrjedhën e lojës dhe arriti të triumfojë bindshëm në fund me rezultatin e pastër 3:0. Për 23-vjeçarin, ky realizim shton statistikat e tij pozitive për këtë edicion, ku tashmë numëron dy gola dhe dy asistime në tetë paraqitje zyrtare me klubin turk. Ecuria e deritanishme dhe vazhdimësia e treguar si në nivel klubesh ashtu edhe në arenën ndërkombëtare me Shqipërinë përbëjnë një lajm shumë të mirë për lojtarin, i cili synon të ruajë këtë ritëm edhe në sfidat e ardhshme.