Laporta mbështet fuqishëm Lamine Yamal për Topin e Artë: Ai e meriton plotësisht

Kreu i skuadrës së Barcelonës, Joan Laporta, ka ritheksuar mbështetjen e tij të plotë për sulmuesin Lamine Yamal në garën për fitimin e Topit të Artë, duke theksuar se talenti i ri e gëzon me të drejtë këtë çmim prestigjioz pas një edicioni fantastik dhe plot suksese. Gjatë një daljeje publike, Laporta ka vlerësuar lart sukseset e 19-vjeçarit dhe nuk ka fshehur dëshirën e tij për ta parë yllin e katalanasve duke ngritur lart trofeun më të rëndësishëm individual. Për më tepër, ai ka komentuar edhe natyrën e drejtpërdrejtë të lojtarit, duke e krahasuar atë me rivalitetin e dikurshëm mes Lionel Messit dhe Cristiano Ronaldos. Këto deklarata vijnë në një periudhë kur klubi blaugrana po e orienton projektin sportiv rreth Yamalit, ndikimi i të cilit në fushën e blertë e ka shndërruar në një ndër figurat më të ndjekura të futbollit ndërkombëtar. Laporta ka qenë tejet i qartë rreth shanseve reale që ka adoleshenti për të triumfuar në këtë garë. “Është e drejtë që ai ta fitojë. Ka pasur një sezon të shkëlqyer dhe ka fituar disa trofe shumë të rëndësishëm, si La Liga dhe Botërorin. Ai e meriton ta fitojë Topin e Artë. Kështu ndihet ai dhe mendoj se është shumë mirë që po shprehet hapur. Është një djalosh shumë i sinqertë, shumë i drejtpërdrejtë dhe shumë i ri. Duhet ta kemi gjithmonë parasysh këtë. Do të isha shumë i lumtur nëse ai do ta fitonte. Do të shohim se si do të shkojë. Gjithçka është e mbuluar me mister. Po presim me padurim”, u shpreh ai. Presidenti ka marrë në mbrojtje edhe entuziazmin e shfaqur nga lojtari dhe dëshirën e tij për të folur hapur, duke kërkuar që mosha e tij e re të merret parasysh kur bëhen analiza për deklaratat e tij publike. “Lamine është plot entuziazëm për ta shprehur futbollin e tij kur luan. Meritat e tij si futbollist njihen gjerësisht. Mosha e tij e re sjell me vete një entuziazëm të caktuar. E kuptoj që ndonjëherë ai e shfaq këtë”, shtoi kreu i klubit. Duke analizuar garën për trofeun, Laporta pranoi se ajo mund të prodhojë tensione apo rivalitete, por vuri në dukje se rrethanat aktuale ndryshojnë nga ato të epokës Messi-Ronaldo. “Ekziston një lloj rivaliteti; me Messin dhe Cristianos nuk ishte krejtësisht njësoj. Për mua, gjithmonë duhej të ishte Messi, por ata nuk e promovonin vetveten. Nuk duhet të rrëmbehemi nga emocionet. Është një reagim njerëzor i një djaloshi 19-vjeçar që është gati të bëjë histori”, theksoi ai. Në të njëjtën kohë, Laporta nuk ka lënë pa përmendur situatën e Raphinhas, i cili u dëmtua gj9 kohës që ishte i grumbulluar me kombëtaren e Brazilit, duke dhënë një lajm pozitiv rreth gjendjes së tij fizike. “Ai u lëndua, u kthye dhe është rikuperuar këtu. Mjekët thonë se do të jetë i gatshëm për ndeshjen në Paris. Këto janë situata që duhet t’i pranojmë”, u shpreh ai. Në mbyllje të fjalës së tij, drejtuesi i lartë i Barcelonës u ndal te ngarkesa e madhe e kalendarit të kombëtareve, duke e cilësuar atë si një sfidë të madhe për klubet, sidomos kur futbollistët kthehen të dëmtuar dhe kërkojnë kohë për t'u rikuperuar plotësisht. “Është një goditje e madhe për klubin; është pothuajse si një fazë parasezonale. Këtë vit nuk do ta ndryshojmë këtë. Duhet të bëjmë më të mirën me atë që kemi. E dinim këtë që më parë dhe ishim të përgatitur”, përfundoi Laporta.