Reagimi i fortë i Altin Krasniqit: Vendimi i Hagës është goditje për vetë themelet e UÇK-së

Altin Krasniqi, djali i ish-kryetarit të Kuvendit dhe ish-zëdhënësit të Ushtrisë Çlirimtare të Kosovës, Jakup Krasniqit, ka dalë me një reagim të ashpër pas vendimit të Dhomave të Specializuara në Hagë ndaj ish-krerëve të kësaj ushtrie. Nëpërmjet një shkrimi të publikuar në rrjetet sociale, Krasniqi ka ngritur pretendimin se aktgjykimi ndaj liderëve të UÇK-së është bazuar mbi funksionet që ata dikur mbanin në hierarkinë e organizatës. “U DËNUA UÇK-ja, JO INDIVIDËT. Nëse ua heqim pozitat që kanë mbajtur në Shtabin e Përgjithshëm të UÇK-së dhe i gjykojmë vetëm individualisht, mbi veprimet konkrete të secilit, ata sot do të ishin të lirë”, ka shkruar ai në profilin e tij. Më tej, Krasniqi ka vënë në dukje se katër personalitetet e larta të UÇK-së dhanë më pas një kontribut të çmuar në zhvillimet politike që i dhanë drejtim fatit të vendit. “Pikërisht për shkak të pozitave të tyre në UÇK, ata u bënë ndër figurat kryesore që negociuan dhe nënshkruan Marrëveshjen e Rambujesë dhe më pas kontribuuan në krijimin e shtetit të Kosovës”, ka shkruar Krasniqi. Në përmbyllje të reagimit të tij, ai ka potencuar se ky dënim shkon përtej përgjegjësisë personale, duke cenuar drejtpërdrejtë vetë sakrificën sublime të qytetarëve të Kosovës për liri.