Situatë e tensionuar: Irlanda shtyn paraqitjen për media para ndeshjes me Izraelin, shtohen pikëpyetjet

Përfaqësuesja e Irlandës ka marrë vendim që të shtyjë konferencën për shtyp, e cila ishte parashikuar të mbahej në prag të sfidës së së dielës kundër Izraelit, duel ky i vlefshëm për Ligën B të Ligës së Kombeve. Trupa e udhëhequr nga trajneri Heimir Hallgrimsson pritet të matë forcat me izraelitët në qytetin Debrecen të Hungarisë, me takimin që është caktuar të nisë të dielën nga ora 20:45. Ky hap për të shtyrë fjalimin zyrtar vjen në një atmosferë mjaft të ndjeshme, pasi në opinionin publik irlandez janë ngritur zëra të fuqishëm që kërkojnë bojkotimin e kësaj ndeshjeje nga ana e kombëtares, si shenjë proteste ndaj konfliktit në Gaza. Ndërkohë që solidariteti me popullin palestinez mbetet i lartë brenda vendit, Federata e Futbollit të Irlandës ka pranuar hapur se ekzistojnë shqetësime serioze lidhur me zhvillimin e këtyre takimeve. Kujtojmë se pas disfatës së pësuar nga Kosova, në radhët e opinionit sportiv irlandez pati edhe kërkesa nga yjet e ekipit për të mos u paraqitur në këtë përballje. Sipas agjendës fillestare, strategu Hallgrimsson dhe njëri nga lojtarët duhet të dilnin para gazetarëve duke filluar nga ora 10:15, para se skuadra të niste seancën stërvitore. Megjithatë, takimi me median u anulua dhe delegacioni irlandez nuk u paraqit as në kompleksin stërvitor. Për momentin, shtëpia e futbollit irlandez nuk ka dhënë ndonjë afat kohor se kur mund të zhvillohet kjo konferencë e shtypur. Irlanda e ka nisur fushatën e re në Ligën e Kombeve me rezultat negativ, pasi të enjten u mposht në Prishtinë nga Kosova me shifrat minimaliste 1-0. Përballja e ardhshme ndaj Izraelit po përcillet me një interesim të jashtëzakonshëm dhe nën masa të shtuara vëmendjeje, krejt kjo për shkak të kontekstit politik dhe thirrjeve të vazhdueshme për bojkot.