Afera e dyshimtë në Prishtinë? Kërçeli akuzon Ramën për keqpërdorim të emrit të UÇK-së në projektin milionësh

Deputeti i Lëvizjes Vetëvendosje, Ilir Kërçeli, ka hedhur akuza të forta ndaj kryetarit të Prishtinës, Përparim Rama, duke aluduar se ai synon të përfitojë shuma të mëdha financiare përmes keqpërdorimit të emrit të Ushtrisë Çlirimtare të Kosovës (UÇK). Sipas pretendimeve të Kërçelit, është planifikuar një investim prej 1 milion eurosh për vendosjen e shtyllave me flamuj të UÇK-së në pikat hyrëse dhe dalëse të kryeqytetit, ndërkohë që kostoja reale e një nisme të tillë llogaritet të jetë përafërsisht 300 mijë euro. “Kjo ngre dyshime serioze dhe kërkon sqarime se si është arritur në shumën prej 1 milion eurosh dhe ku do të shkojnë 700 mijë eurot e diferencës,” ka shkruar Kërçeli, duke ngritur alarmin për keqpërdorim të mundshëm të buxhetit. Në reagimin e tij, ligjvënësi ka paralajmëruar ndërmarrjen e hapave konkretë institucionalë, duke deklaruar se do të kërkojë qasje të plotë në dosjen e plotë të projektit dhe në të gjitha dokumentet financiare përkatëse. “Qytetarët e Prishtinës meritojnë transparencë dhe llogaridhënie. Ata do të informohen fije për pe për çdo euro të planifikuar dhe të shpenzuar në këtë projekt,” u shpreh ai. Në përmbyllje të qëndrimit të tij publik, Kërçeli theksoi se vlerësimi ndaj vlerave të luftës nuk bëhet nëpërmjet tenderëve të dyshimtë: “Respekti për UÇK-në dëshmohet me vepra dhe dinjitet, jo me projekte të dyshimta milionëshe në emër të saj!”