Vëllaznimi zhyten në krizë pas përmbysjes spektakolare nga Istogu, Rilindja 1974 kapërcen në vendin e dytë

Kriza e Vëllaznimit të Gjakovës është thelluar edhe më tej në Ligën e Parë të Kosovës në futboll, pasi kuqezinjtë kanë regjistruar një tjetër disfatë, kësaj radhe në udhëtim te skuadra e Istogut me shifrat 3:2, në kuadër të xhiros së nëntë. Në kampin vendas triumfi është përjetuar me entuziazëm të madh, ndërsa klubi ka publikuar një reagim zyrtar ku thuhet: “Rikthim i çmendur! Nga disavantazhi 0:2, djemtë tanë, në pjesën e dytë, e dominuan kundërshtarin me lojë, duke shënuar tre gola për një fitore të madhe kundër një skuadre mjaft të fortë siç është Vëllaznimi”. Krahas kësaj sfide, zhvillime të rëndësishme ka pasur edhe në ndeshjet e tjera, ku Rilindja 1974 nga Lugu i Baranit ka siguruar një fitore tejet të vlefshme jashtë fushe, duke mposhtur minimalisht 1:0 Tefik Çangën e Tërnit. Ndërkaq, skuadra e Lepencit është kthyer me një pikë nga udhëtimi, pasi ka barazuar pa gola, 0:0, ndaj Suharekës. Pas këtyre ndeshjeve, Rilindja 1974 pozicionohet në vendin e dytë të klasifikimit me 17 pikë të tubuara, ndërsa Vëllaznimi rrezikon seriozisht duke mbajtur vendin e 11-të me vetëm 10 pikë. Në tabelë, Suhareka renditet e pesta me 13 pikë, aq sa ka edhe Istogu që ndodhet një shkallë më poshtë, në pozitën e shtatë. Ndërkohë, Lepenci kapërcen në kuotën e 8 pikëve në vendin e 16-të, kurse Tefik Çanga vazhdon të mbyllë renditjen tabelore me vetëm 3 pikë në llogarinë e saj.